ही शिक सर्व कारभाऱ्यांना... अधिकार नसताना वारस प्रमाणपत्र देणाऱ्या लिहाखेडीच्या सरपंच अनिता साखळे पायउतार!

By City News Desk

On 25 Jul 2025

ही शिक सर्व कारभाऱ्यांना... अधिकार नसताना वारस प्रमाणपत्र देणाऱ्या लिहाखेडीच्या सरपंच अनिता साखळे पायउतार!

सिल्लोड (सीएससीएन वृत्तसेवा) : अधिकार नसताना वारस प्रमाणपत्र देणाऱ्या आणि चौकशीत मला कायद्याचे ज्ञान नव्हते, असे म्‍हणणाऱ्या लिहाखेडी (ता. सिल्लोड) येथील सरपंच अनिता नामदेव साखळे यांना विभागीय आयुक्‍तांनी अपात्र ठरवले आहे.

लिहाखेडी येथील ग्रामपंचायत सदस्य प्रकाश कौतिकराव साखळे यांनी सन २०२३ मध्ये विभागीय आयुक्‍तांकडे यासंदर्भात तक्रार केली होती. सरपंचाला वारस प्रमाणपत्र देण्याचे अधिकार नसताना अनिता साखळे यांनी गावातील एका व्यक्तीला त्याचे स्वयंघोषणापत्र घेऊन वारस प्रमाणपत्र दिले होते. सरपंचपती नामदेव साखळे हेही ग्रामपंचायतीच्या कामात हस्तक्षेप करतात, असा आरोप होता.

जिल्हा परिषद मुख्य कार्यकारी अधिकाऱ्यांच्या दालनात दोन्ही पक्षांचे म्हणणे ऐकण्यात आले. मला कायद्याचे ज्ञान नसल्याने वारस प्रमाणपत्र दिले, मात्र ते नंतर रद्दही केले, अशी बाजू अनिता साखळे यांनी मांडली. मात्र अधिकार नसताना त्यांनी केलेल्या कामामुळे विभागीय आयुक्त जितेंद्र पापळकर यांनी त्‍यांना अपात्र घोषित केले. या ग्रामपंचायतीच्या पदाधिकाऱ्यांचा कार्यकाळ दोनच महिने शिल्लक राहिला आहे. दोन महिने आधीच त्‍यांचे सरपंच पद गेल्याने पुढील निवडणुकीतहा हा मुद्दा विरोधक गाजवण्याची शक्‍यता आहे.