महापालिकेच्या प्रभाग रचनेत राजकीय हस्तक्षेप?; ठाकरे गटाच्या आरोपामुळे नवा वाद 

छत्रपती संभाजीनगर (सीएससीएन वृत्तसेवा) : महापालिकेची निवडणूक घेण्याच्या दृष्टीने निवडणूक आयोगाने हालचाली सुरू केल्या आहेत. प्रशासनाने चार वॉर्डांचा एक प्रभाग यानुसार प्रारूप प्रभाग रचना तयार केली आहे. अशातच प्रारूप प्रभाग रचनेत राजकीय हस्तक्षेप झाल्याचा आरोप ठाकरे गटाने केल्याने राजकीय वर्तुळात खळबळ उडाली आहे.

प्रारूप प्रभाग रचनेचे काम निवडणूक आयोगाच्या अखत्यारित यंत्रणेकडून होणे गरजेचे होते. मात्र राज्य शासनाने अधिकारी नियुक्त करून काम केले. त्‍यामुळे ठाकरे गटाचा संशय वाढल्याचे दिसून येत आहे. सर्वोच्च न्यायालयाने दिलेल्या आदेशाचे पालन करून प्रभाग रचना व्हावी, अशी मागणी ठाकरे गटाने राज्य निवडणूक आयोगाच्या आयुक्तांकडे केली आहे. प्रारूप प्रभाग रचनेचा प्रस्ताव नगरविकास विभागाला सादर करण्यासाठी १ ते ५ ऑगस्टचा वेळ देण्यात आल आहे. त्‍याआधी एससी, एसटीचे आरक्षण किती ठेवायचे याबाबत राज्‍य शासनाच्या आदेशाची प्रतीक्षा आहे.

आरक्षण नमूद करून प्रस्ताव पूर्ण करावा लागणार आहे. आता ठाकरे गटाने केलेल्या तक्रारीवर निवडणूक आयोग काय निर्णय घेतो, याकडे सर्वांचे लक्ष लागले आहे. महापालिकेची शेवटची निवडणूक २०१५ साली झाली होती. त्‍यानंतर वर्षभराने सातारा-देवळाई या दोन वॉर्डांच्या पोटनिवडणुका झाल्या होत्‍या. २०२० मध्ये महापालिकेची निवडणूक होणे आवश्यक असताना कोरोना साथीमुळे निवडणूक लांबली. ती आता लांबतच गेली. आता यंदा दिवाळीपूर्वी निवडणूक होण्याची शक्‍यता आहे.