छत्रपती संभाजीनगर (सीएससीएन वृत्तसेवा) : पैशांसाठी ब्‍लॅकमेल करून बलात्काराचा खोटा गुन्हा दाखल करण्याची धमकी देणाऱ्या प्रेयसीला संतप्त प्रियकराने डोके दगडावर आपटून ठार केले. त्‍यानंतर मृतदेह दौलताबाद घाटात फेकून देत स्वतः शिऊर पोलीस ठाण्यात येऊन हजर झाला. ही धक्कादायक घटना आज, २५ जुलैला सकाळी समोर आल्यानंतर एकच खळबळ उडाली.
दीपाली गणेश आस्वार (वय २३, रा. अब्दिमंडी, ता. छत्रपती संभाजीनगर) असे हत्‍या झालेल्या प्रेयसीचे नाव असून, सुनील सुरेश खंडागळे (वय १९, मांडकी, ता. वैजापूर) असे संशयित प्रियकराचे नाव आहे. दीपालीचा विवाह वैजापूर तालुक्‍यातील लोणवा येथील शंकर त्रिभुवनसोबत झाला होता. तिला दोन वर्षांची एक मुलगीही आहे. मात्र काही महिन्यांपूर्वी तिचे सुनीलसोबत अनैतिक संबंध प्रस्थापित झाले होते. यामुळे ती पतीपासून विभक्‍त होत अब्‍दिमंडीतील आजीकडे राहत होती. बुधवारी दीपाली कन्‍नड तालुक्‍यातील अंधानेर येथे राहणाऱ्या लहान बहिणीला भेटायला गेली होती. गुरुवारी (२४ जुलै) रात्री दीपालीला भेटायला सुनील दुचाकीने अंधानेरला आला. तिला घेऊन अब्‍दिमंडीकडे निघाला.
रात्री १० पासून मध्यरात्रीच्या अडीचपर्यंत ते दौलताबाद घाटात कठड्यावर बसून त्‍यांच्यात गप्पा रंगल्या होत्‍या. मोबाइलमध्ये त्‍यांनी फोटोही काढले. या वेळी दीपालीने एक लाख रुपये मागितले. पैसे न दिल्यास बलात्काराचा खोटा गुन्हा दाखल करेल, अशी धमकी दिली. त्‍यामुळे सुनीलचा संताप अनावर झाला. यापूर्वीही वारंवार पैशांसाठी त्रास देत असल्याने आणि आता चक्‍क १ लाख रुपये मागितल्याने भान हरपलेल्या सुनीलने दीपालीचे डोके दगडावर जोरात आपटले. ती रक्‍तबंबाळ होऊन जागीच मृत्‍यूमुखी पडली. नंतर सुनीलने मृतदेह दौलताबाद घाटातच फेकून दिला.
त्‍यानंतर थेट तो शिऊर पोलीस ठाण्यात दाखल झाला. पोलिसांकडे त्‍याने खुनाची कबुली दिली. सहायक पोलीस निरीक्षक वैभव रणखांब यांनी तातडीने दौलताबाद पोलिसांना कळवले. दौलताबादच्या पोलीस निरीक्षक रेखा लोंढे यांनी सहकाऱ्यांसह घटनास्थळ गाठून मृतदेह शोधला. अग्निशमन विभागाच्या मदतीने मृतदेह बाहेर काढण्यात आला. दुपारी ४ वाजता दौलताबाद पोलिसांनी शिऊर पोलिस ठाण्यातून सुनीलला ताब्यात घेतले. दीपालीच्या बहिणीच्या तक्रारीवरून त्याच्याविरुद्ध गुन्हा दाखल करण्यात आला आहे.
दोघेही नातेवाइक
दीपाली बलात्काराचा गुन्हा दाखल करण्याची धमकी देत होती. बलात्कारापेक्षा मर्डरचा गुन्हा परवडतो, म्हणून मारून टाकले, अशी कबुली सुनीलने शिऊर पोलिसांत दिली होती. मात्र दौलताबाद पोलिसांनी ती बोलत नव्हती, सोबत राहण्यास तयार नव्हती म्हणून मारले, अशी नोंद केली आहे. दीपाली ही सुनीलच्या भावजींची भाची आहे. सुनील अकरावीत शिकतो व बँड पथकात काम करतो. खून केल्यानंतर सुनील घरी गेला. वडिलांना दुचाकी, मोबाइल दिला. आंघोळ करून कपडे बदलून तो शिऊर पोलीस ठाण्यात निवांत हजर झाला. पहाटे अडीचला प्रेयसीचा खून करून आल्याचे त्‍याने पोलिसांना सांगितल्यावर पोलीसही शॉक्‍ड झाले. हत्येनंतर सुनीलने इन्स्टाग्रामवर आनंदी चेहऱ्याचे स्टेटस ठेवले होते, हे विशेष.
.jpg)
