पाऊस ‘ताण’ देतो म्‍हणून शिवाजीनगर भुयारी मार्ग पत्र्यांनी झाकणार!, उद्यापासून ३१ जुलैपर्यंत दर्गा चौकातून वळसा घालावा लागणार

छत्रपती संभाजीनगर (सीएससीएन वृत्तसेवा) : शिवाजीनगर भुयारी मार्गात साचणाऱ्या पावसाच्या पाण्यावर आता जागतिक बँक प्रकल्प विभागाने  जालीम उतारा शोधला आहे. भुयारी मार्गावर पोल उभे करून लोखंडी जाळ्या लावून त्यावर पत्रे बसवण्यात येणार आहे. या कामासाठी २६ ते ३१ जुलै या कालावधीत भुयारी मार्ग बंद राहणार आहे.

१४ वर्षे ज्‍या भुयारी मार्गासाठी लढा दिला, तो झाल्यानंतरही नागरिकांची दैना संपली नाही. कामातील अनेक त्रुटी समोर येत आहेत. थोड्याच्या पावसातही पुलात सहा ते सात फुटांपर्यंत पाणी साचून मार्ग बंद पडतो. पाणी साचल्यावर भुयारी मार्गात प्रवेश न करण्याच्या सूचना भिंतीवर लिहिलेल्या आहेत. आता त्‍यापुढे जाऊन भुयारी मार्ग पत्र्यांनी झाकण्याचा निर्णय घेण्यात आला. हे काम होईपर्यंत देवळाई चौक, गोदावरी टी मार्गे संग्रामनगर उड्डाणपुलावरून वाहने येजा करतील.

देवळाई टी-एमआयटी कॉलेज, महानुभाव आश्रम चौक, रेल्वेस्टेशन मार्गेही येजा करू शकतात. सातारा, देवळाई परिसरात पाच लाखांहून अधिक नागरिक राहतात. भुयारी मार्गात पाणी साचत असल्याने निचऱ्यासाठी तातडीने उपाययोजना करण्याच्या सूचना खासदार डॉ. भागवत कराड यांनी केल्या होत्‍या. मात्र त्‍यावर थातूरमातूर उपाय शोधण्यातच अभियंते गुंतल्याचे दिसून येते. आता पाच दिवस भुयारी मार्गच बंद ठेवण्यात येणार असल्याने संग्रामनगर उड्डाणपूल, शहानुरमियाँ दर्गा चौकात वाहतुकीचा ताण वाढणार आहे. कामादरम्‍यान अनुचित प्रकार टाळण्यासाठी भुयारी मार्ग बंद ठेवण्याचा निर्णय वाहतूक पोलिसांनी घेतला आहे. हे काम दिवसा करण्याऐवजी रात्रीही करता आले असते, त्‍यासाठी भुयारी मार्ग बंद ठेवण्याची गरज नव्हती, असे नागरिकांचे म्‍हणणे आहे.