झोडेगाव जि. प. शाळेच्या २ मुलांच्या अपहरणाचा प्रयत्‍न झाल्याने खळबळ, गंगापूर तालुक्‍यातील प्रकार

गंगापूर (सीएससीएन वृत्तसेवा) : गंगापूर तालुक्यातील झोडेगाव जिल्हा परिषदेच्या शाळेतील दोन विद्यार्थ्यांच्या अपहरणाचा प्रयत्‍न झाल्याने खळबळ उडाली आहे. दोन्ही विद्यार्थी १३ वर्षांचे असून, एक झोडेगावचा तर दुसरा खडक वाघलगावचा आहे. काल, २३ जुलै व आज, २४ जुलैला या घटना घडल्या. पालक व ग्रामस्थांमध्ये भीतीचे वातावरण निर्माण झाले आहे.

पालकांनी दिलेल्या माहितीनुसार, खडक वाघलगाव येथील १३ वर्षीय मुलगा झोडेगावच्या जिल्हा परिषद शाळेत ८ वीत शिकतो. तो शाळेत येत असताना बुधवारी सकाळी नऊला दुचाकीवरून आलेल्या दोघांनी त्याच्या तोंडावर पावडरसारखे काहीतरी फेकले. सतर्क मुलगा जवळच्याच मकाच्या शेतात पळाला. त्याच वेळेस एक गाडी आल्याने अपहरणकर्ते झोडेगावच्या दिशेने पळून गेले. दुसरी घटना आज, २४ जुलै रोजी सायंकाळी ४ वाजता  घडली. झोडेगावचाच १३ वर्षीय मुलगा शाळा सुटल्यानंतर शाळेतून शेतवस्तीकडे घरी जात होता.

पोल्ट्री फार्मजवळ दुचाकीवरूनच आलेल्या दोघा मास्क घातलेल्या व्यक्तींनी त्याला थांबवून चॉकलेट देण्याचा प्रयत्न केला व त्याचा हात पकडला. मुलाने त्‍यांना हिसका देत जवळच्याच गायरानातून धावत घरी पोहोचला. घडलेला प्रकार आईला सांगितला. मुलाने दफ्‍तर अपहरणकर्त्यांना मारून फेकल्याने तिथेच पडले होते. आईसह शेजारी घटनास्थळी पोहोचले आणि दप्तर घरी आणले. या दोन्ही घटनांनंतर गावकऱ्यांत खळबळ उडाली असून, पालकांमध्ये मुलांच्या सुरक्षेबाबत चिंता व्यक्त केली जात आहे. दरम्‍यान, वृत्त लिहीपर्यंत या दोन्ही घटनांची नोंद पोलिसांत नव्हती.