खळबळजनक : १३ ग्रामपंचायतींचे ७५ लाख खासगी ऑपरेटरने हडपले ; वैजापूर तालुक्‍यातील धक्कादायक प्रकार, विस्तार अधिकारी, ग्रा.पं. अधिकारी संशयाच्या भोवऱ्यात

By City News Desk

On 24 Jul 2025

खळबळजनक : १३ ग्रामपंचायतींचे ७५ लाख खासगी ऑपरेटरने हडपले ; वैजापूर तालुक्‍यातील धक्कादायक प्रकार, विस्तार अधिकारी, ग्रा.पं. अधिकारी संशयाच्या भोवऱ्यात

वैजापूर (सीएससीएन वृत्तसेवा) : विकासकामे करण्यासाठी १३ ग्रामपंचायतींना सरकारने दिलेले ७५ लाख रुपये खासगी ऑपरेटर अविनाश दादासाहेब पवार याने आपल्या बँक खात्‍यात वळवल्याचा धक्कादायक प्रकार वैजापूरमध्ये समोर आला आहे. १५ व्या वित्त आयोगासह अन्य योजनांची ही रक्‍कम आहे. डीएससीद्वारे (डिजिटल सिग्नेचर कॉम्प्युटर) ती पवारने स्वतःच्या खात्‍यात घेतली. या प्रकारामुळे ४ विस्तार अधिकारी व १२ ग्रामपंचायत अधिकारी संशयाच्या भोवऱ्यात अडकले असून, त्‍यांना बुधवारी (२३ जुलै) गटविकास अधिकाऱ्यांनी कारणे दाखवा नोटीस बजावली.

शासनाकडून मिळणारा निधी डीएससीद्वारे संबंधित काम करणाऱ्यांना वाटप केला जातो. सरपंच व ग्रामसेवक यांच्या नावाने असलेले डीएससी एकप्रकारे ग्रामपंचायतींचे एटीएम कार्डच असते. व्यवहार झाल्याचा मेसेज गटविकास अधिकारी, सरपंच, ग्रामसेवकाला मिळत असतो. ग्रामपंचायतीत हे काम खासगी ऑपरेटरकडून होते. वैजापूर तालुक्यातील १२ ग्रामपंचायतींचा निधी ऑपरेटर अविनाश पवारने हडपला.

कंत्राटदार आणि साहित्य विक्रेत्‍यांनी ग्रामपंचायतींकडे चकरा मारायला सुरुवात केली, तेव्हा ही धक्कादायक बाब समोर आली. हे प्रकरण सुरुवातीला खासगीत मिटविण्याचा प्रयत्‍न झाला, पण हडपलेली रक्‍कम भरली जात नसल्याने अखेर गटविकास अधिकारी श्रीकृष्ण वेणीकर यांनी सर्व १३ ग्रामपंचायत अधिकारी आणि विस्तार अधिकारी अमेय पवार, बी. आर. म्हस्के, दीपक अकोलवाड, आर. एल. राठोड यांना कारणे दाखवा नोटीस बजावली आहे. मनेगाव, खरज, भिवगाव, चोरवाघलगाव, हाजीपूरवाडी, आंचलगाव, रघुनाथपूरवाडी, अव्वलगाव, सटाणा, भग्गाव, बेलगाव, वडजी या ग्रामपंचायतींमध्ये हा घोळ समोर आला आहे.