पतीचे आतेबहिणीशी प्रेमसंबंध, विवाहितेला कळताच विष पिऊन आत्‍महत्‍या!, गंगापूर तालुक्‍यातील धक्कादायक घटना

गंगापूर (सीएससीएन वृत्तसेवा) : पतीचे त्‍याच्या आतेबहिणीशी प्रेमसंबंध असल्याचे विवाहितेला कळल्यानंतर तिने तातडीने माहेरी याची माहिती दिली. त्‍यानंतर पती व सासरच्यांकडून तिला त्रास सुरू झाला. २१ जुलैला तिने आईला कॉलवर ‘मी वर गेल्यावरच न्यायला या', असे सांगितले आणि सायंकाळी विष पिऊन आत्‍महत्‍या केली. ही धक्कादायक घटना देरडा (ता. गंगापूर) येथे समोर आली आहे. या घटनेमुळे तालुक्‍यात खळबळ उडाली असून, शिल्लेगाव पोलिसांनी पती, सासू- सासऱ्याविरुद्ध आत्महत्येस प्रवृत्त केल्याचा गुन्हा दाखल करून तिघांनाही अटक केली आहे.

जया पवन सोनवणे (वय २०, रा. देरडा) असे मृत्‍यू झालेल्या विवाहितेचे नाव आहे. तिचे चार वर्षांपूर्वी पवन लक्ष्मण सोनवणे याच्याशी लग्न झाले होते. सुरुवातीला तिला सासरी चांगले वागवण्यात आले. काही दिवसांनी तिला कळले, की पवनचे त्‍याच्या आतेबहिणीशी प्रेमसंबंध आहेत. तिने माहेरी याबाबत सांगितले होते. त्‍यामुळे जयाला पती पवन, सासरे लक्ष्मण सोनवणे आणि सासू मीरा लक्ष्मण सोनवणे यांच्याकडून त्रास सुरू झाला. त्रासाला कंटाळून जयाने तिला माहेरी घेऊन जाण्याची आई व भावाला विनंती केली.

काही दिवसांपूर्वी तिने आईला कॉल करून आता माझी सहनशक्ती संपली असून, त्‍यांचे प्रेमसंबंध दिवसेंदिवस वाढत आहेत. इथे राहणे शक्य नाही, असे सांगितले. त्‍यावर भावाने दोन दिवसांत न्यायला येतो, असे तिला समजावले होते. २१ जुलैला सकाळी आईने तिला कॉल असता तिने ‘मी वर गेल्यावरच न्यायला या' असे सांगून कॉल कट केला आणि विष पिले. तिला छत्रपती संभाजीनगरच्या घाटी रुग्णालयात दाखल केले होते. मात्र दुपारी साडेचारला उपचारादरम्‍यान तिचा मृत्‍यू झाला. अधिक तपास पोलीस करत आहेत.