घृष्णेश्वराचे तत्‍काळ दर्शन घडवणारे 'हे' ५ भामटे पोलिसांनी शोधले! शेख सिकंदर, समत खान, सरवर शेख, शांतीलाल ढिवरे, सय्यद इम्रान यांच्याविरुद्ध गुन्हा दाखल, भाविकांची करायचे लूट

खुलताबाद (सीएससीएन वृत्तसेवा) : सध्या श्रावण महिन्यात वेरूळ येथील श्री घृष्णेश्वर आणि भद्रा मारोतीच्या दर्शनासाठी येणाऱ्या भाविकांची सर्रास लूट सुरू आहे. दोन्ही ठिकाणी पार्किंग शुल्‍काच्या नावाखाली अव्वाच्या सव्वा रक्‍कम घेणे सुरूच आहेच, त्‍याचबरोबरच घृष्णेश्वराच्या दर्शनासाठी भाविकांची तत्‍काळ दर्शन घडवून आणण्याच्या नावाखाली आर्थिक लूट होत आहे. याबद्दलच्या बातम्‍या आल्यानंतर पोलिसांनी बारकाईने या लुटीकडे लक्ष केंद्रीत केले असून, प्रतिव्यक्ती १०० रुपये वसूल केल्याप्रकरणी खुलताबाद पोलीस ठाण्यात ५ भामट्यांविरुद्ध रविवारी सायंकाळी पाचच्या सुमारास गुन्हा दाखल करण्यात आला आहे.

शेख सिकंदर शेख सांडू (रिक्षा क्र. एमएच २० ईएफ ०२२४), समत खान बाबू खान (रिक्षा क्र. एमएच २० ईएफ १७१६), सरवर शेख अन्तर शेख (रिक्षा क्र. एमएच २० ईएफ २५०९), शांतीलाल अशोक ढिवरे (रिक्षा क्र. एमएच २० ईके ५४७५), सय्यद इम्रान सय्यद बाबर (रिक्षा क्र. एमएच २० डीसी ४४४६) अशी गुन्हा दाखल झालेल्या भामट्यांची नावे असून, त्‍यांच्याविरुद्ध राकेशकुमार श्रीदेशराज गुप्ता (रा. पंजाब) यांनी तक्रार दिली आहे. तक्रारीनुसार, गुप्ता हे श्री घृष्णेश्वर मंदिरात दर्शनासाठी आले होते.

भामट्यांनी गुप्ता आणि त्यांच्या सहकाऱ्यांकडून तत्काळ दर्शन करून देतो, असे सांगून प्रतिव्यक्ती १०० रुपयांप्रमाणे पैसे घेतले. मात्र दर्शन करून न देता त्याच्या धार्मिक भावनांचा गैरफायदा घेत फसवणूक केली. अधिक तपास पोलीस निरीक्षक धनंजय फराटे करत आहेत. दरम्‍यान, तत्‍काळ दर्शनाच्या नावाखाली होणाऱ्या फसवणुकीबद्दल संस्थानने हात वर केले आहेत. वाढत्‍या तक्रारींमुळे खुलताबाद पोलिसांचा बंदोबस्त मंदिर परिसरासह बाहेर पडणाऱ्या दोन्ही दरवाजांवर तैनात केला आहे.

रिक्षाचालक, फुलविक्रेते अन्‌ सुरक्षारक्षक सामील?
तत्‍काळ दर्शनाच्या नावाखाली होणाऱ्या फसवणुकीच्या रॅकेटमध्ये रिक्षाचालक, फुलविक्रेते आणि सुरक्षारक्षक सामील असल्याची चर्चा आहे. पैसे घेऊन भाविकांना अर्ध्या रांगेत सोडून भामटे पसार होतात. दरम्‍यान, पार्किंग शुल्‍काच्या नावाखाली होणाऱ्या अव्वाच्या सव्वा लुटीकडे मात्र प्रशासनाचे दुर्लक्ष आहे. भद्रा मारोती संस्थान आणि घृष्णेश्वर संस्‍थान यांनी पार्किंग ठेकेदारांना भाविकांना लुटण्याची परवानगीच दिल्याचे दिसून येते. यामुळे भाविकांत नाराजी व्यक्‍त होत आहे.