नाल्यात ३ इमारती, त्‍यातली एक चक्क ४ मजली!; शेख काझीम यांची करामत महापालिकेने बुलडोझर लावून पाडली!!; दुसऱ्या दिवशी नारेगावमध्ये ८१ अतिक्रमणे उद्‌ध्वस्त

छत्रपती संभाजीनगर (सीएससीएन वृत्तसेवा) : नारेगावमध्ये सलग दुसऱ्या दिवशी मंगळवारी (५ ऑगस्ट) अतिक्रमण हटाव मोहीम राबवून महापालिकेने ८१ अतिक्रमणांवर बुलडोझर चालवला. सोमवारी (४ ऑगस्ट) १७५ मालमत्ता पाडल्या होत्या. आता नारेगावचा मुख्य रस्ता १०० फूट रूंद झाला आहे. जयभवानी चौकातून कचरा डेपोकडे जाताना सर्वाधिक डावीकडील मालमत्ता बाधित झाल्या असून, कोणाचे १०, तर कोणाचे ७ फुटांपर्यंत बांधकाम तोडण्यात आले आहे. निवासी मालमत्ता १५ ऑगस्टपर्यंत स्वतःहून काढून घेण्याचे आवाहन महापालिकेने केले आहे.

जळगाव रोड नारेगावमार्गे सावंगी बायपास हा रस्ता १९९१च्या विकास आराखड्यानुसार ३० मीटर रूंदीचा आहे. अतिक्रमणे इतकी वाढली की केवळ १० मीटरच उरला होता. मंगळवारी सकाळी ११ ला नारेगाव येथील नाल्यापासून कारवाईला सुरुवात करण्यात आली. एका धार्मिक स्थळाच्या काही भागासह पुढे दोन ते तीन मजली इमारतींची पाडापाडी केली. कचरा डेपोच्या अलीकडील अनेक शेड अतिक्रमणधारकांनी स्वतःहून काढून घेतले. दुपारी पोलीस आयुक्त प्रविण पवार यांनी पाहणी केली. नारेगाव येथील नाल्यात चक्क ३ मोठ्या इमारती उभारल्याचे समोर आले. यातील एक इमारत तर चक्क चार मजली होती. त्‍या जमीनदोस्त करण्यात आल्या.

शेख काझीम यांच्या मालकीच्या या इमारती असल्याचे समोर आल्यानंतर नाल्यात अनधिकृत बांधकाम केल्याप्रकरणी गुन्हाही दाखल करण्यात येणार असल्याचे महापालिकेकडून स्‍पष्ट करण्यात आले. शेख काझीमने कुरकुरे बनविण्याचा कारखाना ४ मजली इमारतीत सुरू केला होता. नाल्यावर भर टाकून या इमारती उभारल्या होत्‍या. काझीमने दोन दिवसांचा वेळ पथकाकडे मागितला होता. मात्र पथकाने ३ तास देत नंतर लगेचच बुलडोझर चालवले. दरम्‍यान, हर्सूलमधील पाडापाडीसंदर्भात आज, ६ ऑगस्टला सकाळी ११ ला पोलीस आयुक्तालयात महापालिका आणि पोलीस अधिकाऱ्यांची संयुक्त बैठक होणार आहे. बैठकीत कारवाईसंदर्भात निर्णय घेण्यात येणार आहे.

वाळूज एमआयडीसीतील ११५० अतिक्रमणे उद्‌ध्वस्त
वाळूज महानगरात महाराष्ट्र राज्य औद्योगिक विकास मंडळाने पोलिसांच्या मदतीने ११५० अतिक्रमणे उद्‌ध्वस्त केली आहेत. १२०० अतिक्रमणांवर मार्किंग केली होती. सोमवारनंतर दुसऱ्या दिवशी मंगळवारीही कारवाई सुरू होती. मंगळवारी सकाळी आठलाच एमआयडीसीचे १०० तर पोलिसांचे १२५ मनुष्यबळ तैनात केले होते. १२ तास पाडापाडी चालली. प्रादेशिक अधिकारी अमित भामरे, कार्यकारी अभियंता रमेशचंद्र गिरी, वाळूज एमआयडीसी ठाण्याचे पोलीस निरीक्षक रामेश्वर गाडे उपस्थित होते. कारवाईची सुरुवात पंढरपूर ए सेक्‍टरपासून करण्यात आली. चार पथकांनी दिवसभर कारवाई करून रस्‍ते मोकळे केले.