कामावरून घरी परतणाऱ्या महिलेला अडवून म्‍हणाला, तुमचे पती चक्कर येऊन पडले, पुढे महिलेसोबत जे घडले ते धक्कादायक, गुलमंडीत काय घडलं...

छत्रपती संभाजीनगर (सीएससीएन वृत्तसेवा) : कामावरून घरी परतणाऱ्या महिलेला तुमचे पती चक्कर येऊन पडल्याचे सांगून सोबत नेले. एका ठिकाणी बसवून त्‍यांचे ४५ हजारांचे दागिने घेऊन भामटा पसार झाला. ही घटना शहरातील गुलमंडी येथे सोमवारी (४ ऑगस्ट) दुपारी घडली.

ममता रमेश परकेल्लू (वय ४०, रा. बुढीलाईन नई बस्ती मनपामागे, दुर्गादेवी मंदिराजवळ) यांनी या प्रकरणात तक्रार दिली आहे. सोमवारी (४ ऑगस्ट) सकाळी १० ला गुलमंडी येथे काम करून दुपारी २ ला त्या गुलमंडी येथे असताना एक अनोळखी व्यक्‍ती त्यांच्याकडे आला. त्याने सांगितले, की मी तुम्हाला ओळखत असून तुमच्या नातेवाइकांनासुध्दा ओळखतो. त्याने नातेवाइकांची नावेही सांगितली. तो म्हणाला, की तुमचे पती रमेश चक्कर येऊन पडले आहेत. मी तुम्हाला दाखवितो. त्‍यामुळे ममता या त्याच्यासोबत गेल्या. नाथसुपर मार्केट सामना कार्यालयापुढे औरंगपुरा येथील ओट्यावर बसवून त्याने ममता यांना सांगितले, की तुमच्या पतीला रिक्षात टाकून आणायचे आहे.

तुम्ही येथेच बसा. तुमच्या गळ्यातील व कानातील सोन्याचे दागिने काढून तुमच्याकडील पर्समध्ये ठेवा. त्यामुळे ममता यांनी दागिने काढून त्यांच्याकडील छोट्या पर्समध्ये ठेवले. त्यानंतर त्याने दागिने त्याच्याकडील पांढऱ्या प्लास्टिक पिशवीत ठेवायला सांगितले. नजर चुकवून दागिन्याची पर्स काढून घेतली व ममता यांना तेथे बसवून पसार झाला. त्‍याने प्लास्टिक पिशवीची गाठ मारून ममता यांच्याकडे दिली होती. बराच वेळ  वाट पाहत बसल्यानंतर संशय आल्याने त्यांनी पिशवी उघडून पाहिली असता त्यात मोबाईल व चप्पल होती. सोन्याचे दागिने ठेवलेली पर्स नव्हती. त्‍यांनी आजूबाजूला भामट्याचा शोध घेतला. मात्र तो दिसून आला नाही. अखेर त्‍यांनी घरी येऊन नातेवाईकांना घडलेला प्रकार सांगितला. त्‍यानंतर क्रांती चौक पोलीस ठाण्यात येऊन तक्रार दिली. भामट्याने २० हजार रुपयांचे कानातील टॉप्स, २५ हजार रुपयांचे सोन्याचे दोन डोरले व ९० मनी असा एकूण ४५ हजार रुपयांचा मुद्देमाल चोरून नेला. अधिक तपास पोलीस उपनिरीक्षक सुधाकर पाटील करत आहेत.