हद कर दी... शहानूरवाडीत थारला बेल्ट बांधून थेट एटीएम उखडून नेण्याचा प्रयत्‍न!; बेल्ट तुटल्याने मोठा आवाज अन्‌ पळाले चोरटे...

By City News Desk

On 05 Aug 2025

हद कर दी... शहानूरवाडीत थारला बेल्ट बांधून थेट एटीएम उखडून नेण्याचा प्रयत्‍न!; बेल्ट तुटल्याने मोठा आवाज अन्‌ पळाले चोरटे...

छत्रपती संभाजीनगर (सीएससीएन वृत्तसेवा) : थार गाडीला बेल्ट बांधून एटीएम यंत्र थेट उखडून नेण्याचा प्रयत्‍न फसला. मध्येच बेल्ट तुटला अन्‌ चोरांना मशीन सोडून पळून जावे लागले. मशीनमध्ये लाखो रुपयांची रोकड होती. हा अचंबित करणारा प्रकार रविवारी (३ ऑगस्ट) पहाटे तीनला शहानूरवाडीत घडला.

शहानूरवाडीतील एसबीआयच्या शाखेजवळच एटीएम सेंटरही आहे. थार वाहनातून ४ चोर आले. त्‍यांनी सेंटरमध्ये जाऊन त्‍यांनी बराच वेळ पाहणी केली. सर्वप्रथम सर्व सीसीटीव्ही कॅमेरे फोडले. बेल्टने मशीन ओढण्याआधी स्क्रू ड्रायव्हरने एटीएम काढण्याचा प्रयत्‍न केला. त्यात यश न आले नाही. थारने एटीएम थेट उखडून काढण्याचा प्लॅन त्‍यांनी केला. थारला दोन्ही बाजूंनी बेल्ट बांधले. बेल्टचे दुसरे टोक एटीएम मशीनला बांधले. गाडी सुरू करून मशीन ओढले. पण बेल्ट तुटला अन्‌ मोठा आवाज झाला. त्‍यामुळे चोरटे बिथरले आणि त्‍यांनी गाडीतून पळ काढला. नागरिकांनी पोलिसांना कळवल्याने जवाहरनगर पोलीस ठाण्याचे पोलीस निरीक्षक सचिन कुंभार, पोलीस उपनिरीक्षक मारोती खिल्लारे यांनी घटनास्‍थळी धाव घेतली. शाखा व्यवस्थापक विशाल इंदूरकर यांच्या तक्रारीवरून चार चोरट्यांविरुद्ध गुन्हा दाखल करण्यात आला आहे. मशीन नेण्यासाठी काही अंतरावर वाहनदेखील उभे केलेले असावे, असा पोलिसांना संशय आहे.