गंगापूरमध्ये कोयता गँग!; सराफा व्यावसायिकाच्या घरात सिनेस्‍टाइल घुसून कोयत्‍याचे वार करत लुटले ४ लाख !!

गंगापूर (सीएससीएन वृत्तसेवा) : गंगापूर शहरातील वैजापूर मार्गावरील वर्धमान रेसिडेन्सीत सराफा व्यावसायिक आनंदराव निवृत्ती पाटील (वय ५५) यांच्या घरावर सशस्‍त्र दरोडा पडला. कोयत्याचा धाक दाखवून पाटील आणि त्‍यांच्या पत्‍नी सिंधूबाई  (वय ५०) यांना जबर मारहाण करत सोन्याचे दागिने व रोख रकमेसह ४ लाख १५ हजारांचा ऐवज घेऊन दरोडेखोर पसार झाले. ही खळबळजनक घटना सोमवारी (४ ऑगस्ट) रात्री दहाच्या सुमारास घडली.

आनंदराव पाटील यांचे खंडोबा मंदिर परिसरात सराफा दुकान आहे. सोमवारी रात्री दुकान बंद करून ते घरी आले. नंतर १० वाजता पत्नीसोबत जेवण करत असताना अचानक हातात कोयते दरोडेखोर घरात शिरले.  दरवाजा आतून बंद करत त्‍यांनी पती-पत्नीला बेदम मारहाण सुरू केली. एकाने पाटील यांच्या डोक्यात कोयत्याने वार करून गंभीर जखमी केले. पाटील दाम्पत्याचे हात-पाय बांधून तोंडात बोळा कोंबून सोन्याचे दागिने व रोख रकमेसह ४ लाख १५ हजारांचा ऐवज घेऊन पसार झाले.

दाम्‍पत्‍याने एकमेकांचे हातपाय सोडून ओरडाओरड केली. त्यांचा आवाज ऐकून शेजाऱ्यांनी धावत येऊन दरवाजा उघडला. शेजाऱ्यांनी गंभीर जखमी दाम्‍पत्‍याला गंगापूर उपजिल्हा रुग्णालयात दाखल केले. पाटील यांच्या डोक्याला पाच टाके पडले. सिंधुबाई आनंदराव पाटील यांच्या तक्रारीवरून मंगळवारी (५ ऑगस्ट) पहाटे दीडला गंगापूर पोलिसांनी दरोडेखोरांविरुद्ध गुन्हा दाखल केला आहे. पाटील यांनी दुकानातून रोख ३ लाख रुपये आणले होते. त्‍या रक्‍कमेसह पत्नीच्या गळ्यातील ७५ हजार रुपये किमतीचे मंगळसूत्र, २५ हजार किमतीची साखळी, १५ हजारांची अंगठी असा ४ लाख १५ हजारांचा ऐवज दरोडेखोरांनी लुटून नेला. जाताना दरवाजाला बाहेरून कडी लावून गेले.