दुचाकीला ट्रकने उडवले, आजीचा मृत्‍यू, नात-नातू गंभीर जखमी, रुग्णालयातून घरी परतत होते, सिल्लोड तालुक्‍यातील भीषण दुर्घटना

सिल्लोड (सीएससीएन वृत्तसेवा) : दुचाकीला ट्रकने मागून उडवले. यात दुचाकीवरील वृद्धेचा जागीच मृत्‍यू झाला, तर २२ वर्षीय तरुणासह त्याची १५ वर्षीय चुलत बहीण गंभीर जखमी झाली. ही दुर्दैवी घटना जळगाव- छत्रपती संभाजीनगर महामार्गावरील डिग्रस (पानस) फाट्यावर (ता. सिल्लोड) मंगळवारी (५ ऑगस्ट) रात्री ८ ला घडली.

द्वारकाबाई रघुनाथ सोनवणे (वय ७५) असे अपघातात मृत्‍यू झालेल्या वृद्धेचे  नाव आहे. अजय त्र्यंबक सोनवणे (वय २२), संजीवनी विजय सोनवणे (१५, सर्व रा. डिग्रस, ता. सिल्लोड) अशी गंभीर जखमींची नावे आहेत. अजय नुकताच ‘सीआरपीएफ'मध्ये भरती झाला असून, त्याची ट्रेनिंग सुरू आहे. १५ दिवसांची सुटी घेऊन तो डिग्रसला आला आहे. संजीवनी त्याची चुलत बहीण असून, ती आजारी असल्याने तिला व काकू द्वारकाबाई यांना घेऊन अजय दुचाकीने गोळेगाव येथील रुग्णालयात आला होता.

घरी परतत असताना डिग्रस फाट्यावर रस्ता ओलांडताना त्यांच्या दुचाकीला सिल्लोडकडून जळगावकडे जाणाऱ्या ट्रकने (क्र. एमपी ०६, एचजी ३११४) मागून जोरात धडक दिली. द्वारकाबाई ट्रकच्या चाकाखाली आल्याने जागीच मृत्‍यूमुखी पडल्या. अजय व संजीवनी दूर फेकले गेल्याने गंभीर जखमी झाले. त्यांना सिल्लोडच्या उपजिल्हा रुग्णालयात नागरिकांनी दाखल केले. अजिंठा पोलीस ठाण्याचे पोलीस निरीक्षक अमोल ढाकणे यांनी सहकाऱ्यांसह घटनास्थळी येऊन ट्रकसह चालकाला ताब्यात घेतले. संजीवनीच्या आई-वडिलांचे निधन झालेले असून, तिचा सांभाळ आजी द्वारकाबाई करत होत्या.