वैजापूरमध्ये आय लव कॅफेवर पोलिसांचा छापा; तरुण-तरुणी आढळले अश्लील कृत्‍यांत लिप्त !

By City News Desk

On 12 Aug 2025

वैजापूरमध्ये आय लव कॅफेवर पोलिसांचा छापा; तरुण-तरुणी आढळले अश्लील कृत्‍यांत लिप्त !

वैजापूर (सीएससीएन वृत्तसेवा) : सध्या वैजापूरमध्ये कॅफेफॅड चांगलेच वाढले आहे. कॉलेजचे तरुण-तरुणी कॉलेजच्या नावाखाली घरातून बाहेर पडल्यावर तासन्‌तास या कॅफेंमध्ये थांबून एकांत अनुभवतात. वैजापूर पोलिसांनी ही बाब गांभीर्याने घेऊन येवला रोडवरील आय लव कॅफे शॉपवर सोमवारी (११ ऑगस्ट) दुपारी तीनला धडक दिली. सहा तरुण व तीन तरुणींना ताब्यात घेत समज देऊन पालकांच्या स्वाधीन केले.

पोलीस निरीक्षक सत्यजित ताईतवाले यांच्या नेतृत्वातील पथक कॅफेवर धडकताच अश्लील चाळ्यांत गुंतलेले तरुण-तरुणी पळापळ करू लागले. पोलिसांनी त्‍यांना पकडून पोलीस ठाण्यात आणले. त्‍यांच्या आई-वडिलांना पोलीस ठाण्यात बोलावून घेत त्‍यांच्यासमोर तरुण-तरुणींची कानउघडणी केली. त्यानंतर पालकांच्या स्वाधीन केले. कॅफेचालकाला नोटीस बजावण्यात आली आहे. भविष्यात कॅफेमध्ये गैरप्रकार आढळल्यास थेट गुन्हे दाखल करण्यात येतील, असा इशारा पोलीस निरीक्षक सत्यजित ताईतवाले यांनी दिला आहे. शहरात काही कॅफेचालकांनी गैरप्रकारांचा धंदा मांडला असून, तरुण-तरुणींना एकांत मिळण्याची सोय उपलब्‍ध करून दिली आहे. तिथे जोडपी अश्लील कृत्‍यांत रममाण होतात. त्‍यामुळे आता पोलिसांचे यापुढेही सर्व कॅफेंवर करडी नजर राहणार आहे.