गावात कोणासोबतही बोलते, घराची इज्‍जत घालवतेस म्हणत ३८ वर्षीय महिलेला फाशी देण्याचा प्रयत्‍न!; पती, मुलगा, पुतणे, भाया, सासूचे कृत्‍य, वैजापूर तालुक्‍यातील वाकला येथील खळबळजनक घटना 

वैजापूर (सीएससीएन वृत्तसेवा) : तू गावात कोणासोबतही बोलताना दिसते. तू आमच्या घरातील इज्जत घालवतेस, असे म्‍हणत ३८ वर्षीय महिलेला पती, मुलगा, भाया, दोन्ही पुतणे, सासूने बेदम मारहाण करत फाशी देण्याचा प्रयत्‍न केला. रात्रभर महिलेने शेडमध्ये लपून जीव वाचवला. ही खळबळजनक घटना वाकला (ता. वैजापूर) येथे गुरुवारी (१४ ऑगस्ट) रात्री साडेदहाला घडली.

महिलेने तक्रारीत म्‍हटले आहे, की ती पती, दोन मुले, भाया, जाऊ, पुतणे, सासू यांच्यासह एकत्रित राहते. महिलेचे लग्‍न एप्रिल २००२ मध्ये झाले आहे. गुरुवारी रात्री साडेदहाला महिला जेवण करून लहान मुलाच्या शाळेच्या कपड्यांना इस्‍त्री करत होती. त्याचवेळी त्यांचा पुतण्या आला व महिलेला म्हणाला, की तू गावात कोणासोबतही बोलताना दिसते. तू आमच्या घरातील इज्जत घालवतेस, असे म्हणून महिलेच्या चारित्र्यावर संशय घेऊन शिवीगाळ केली.

महिलेचा पती, मुलगा, भाया, पुतण्या व सासू यांनीही महिलेला चापटबुक्क्यांनी मारहाण करून फाशी देण्याचा प्रयत्न केला. महिलेने त्यांच्या तावडीतून सुटका करून घेत घराबाहेर धावली. शेडमध्ये रात्रभर थांबून तिने जीव वाचवला. त्यानंतर त्यांच्या भावाला फोन करून मारहाण झाल्याचे कळविले. महिलेचा भाऊ घरी आला असता महिलेच्या पुतण्याने त्‍यांनाही शिवीगाळ करून लाथाबुक्क्यांनी मारहाण केली. त्यानंतर भाऊ आणि वडिलांसोबत शिऊर पोलीस ठाण्यात येऊन महिलेने पती, मुलगा, भाया, सासू, दोन्ही पुतण्यांविरुद्ध तक्रार दिली. त्‍यावरून पोलिसांनी या सर्वांविरुद्ध गुन्हा दाखल केला आहे.