खुलताबादच्या कोहिनूर महाविद्यालयात संघर्ष पेटला!; संस्थाचालक-प्राध्यापकांतील वादाने घेतले वेगळे वळण...

खुलताबाद (सीएससीएन वृत्तसेवा) : खुलताबाद येथील कोहिनूर महाविद्यालयाच्या प्राचार्य, प्राध्यापकांशी संस्थाचालकांच्या सुरू असलेल्या संघर्षाने आता आणखी एक वेगळे वळण घेतले आहे. संस्था अध्यक्ष डॉ. मजहर खान हे खुलताबाद पोलिसांच्या अटकेत असताना प्राचार्यांना त्‍यांनी फोनवरून खंडणी मागितल्याचे समोर आले होते. आता डॉ. खान हे कारागृहातून बाहेर आले असून, त्यांनी प्राचार्य कमरुन्निसा बेगम इक्रामोद्दीन शेख यांना निलंबित केले. ही कारवाई नियमबाह्य झाल्याचा दावा करत ५५ पेक्षा अधिक प्राध्यापक, कर्मचाऱ्यांनी महाविद्यालयासमोरच रविवारी (१७ ऑगस्ट) उपोषण केले.

उच्च शिक्षण विभागाचे सहसंचालक डॉ. रणजीतसिंह निंबाळकर यांनी उपोषणस्थळी जाऊन प्राध्यापकांच्या मागण्यांचे निवेदन स्वीकारले. त्यानंतर प्राध्यापक, कर्मचाऱ्यांनी उपोषण मागे घेतले. डॉ. खान यांनी कारागृहातून बाहेर येताच विद्यापीठाने मान्यता रद्द केलेले डॉ. शंकर अंभोरे यांना प्राचार्यपदाचा पदभार घेण्याचे आदेश ६ ऑगस्टला दिले. त्यानंतर ९ ऑगस्टला कमरुन्निसा शेख यांना प्राचार्यासह अध्यापक पदावरून निलंबित केले. त्यासाठी २५ कारणे दिली आहेत. विशेष म्‍हणजे, ज्‍या डॉ. अंभोरेंना डॉ. खान यांनी पुन्हा प्राचार्य केले, त्‍यांची मान्यताच डॉ. बाबासाहेब आंबेडकर मराठवाडा विद्यापीठाने रद्द केलेली आहे. डॉ. अंभोरेंवरील विद्यापीठाच्या कारवाईनंतर महाविद्यालयातील कर्मचाऱ्यांच्या वेतनाचा प्रश्न निर्माण झाला होता. त्यामुळे विद्यापीठानेच कमरुन्निसा बेगम यांच्याकडे प्राचार्यपद सोपविले होते.

संघर्ष पेटला...
संस्थाध्यक्ष मजहर खान, सचिव आस्मा खान, सहसचिव मकसूद खान यांचे अधिकार गोठवावेत. महाविद्यालयावर तत्काळ प्रशासक नेमावा. प्राचार्यांचे नियमबाह्य निलंबन रद्द करावे. माजी प्राचार्य शंकर अंभोरे यांच्या काळातील कारभाराची चौकशी व्हावी. कर्मचाऱ्यांच्या सेवापुस्तिका गहाळ केल्याच्या प्रकरणात संस्थाचालकासह इतरांवर गुन्हे दाखल करावेत, अशा ९ मागण्या प्राध्यापकांनी उच्‍च शिक्षण विभागाच्या सहसंचालकांना दिलेल्या निवेदनात केल्या आहेत. त्‍यामुळे आता हा संघर्ष कोणत्‍या वळणार जातो, उच्‍च शिक्षण विभाग आणि विद्यापीठ यात कोणती भूमिका घेते, याकडे सर्वांचे लक्ष लागले आहे.