छ. संभाजीनगरमध्ये खळबळ : प्रेयसीनेच विवाहित प्रियकराचा खून करून मृतदेह फेकला गोदापात्रात!; तो हर्सूलचा, ती सिडकोतील कॅनॉट प्लेसची...  प्रेयसीविरुद्ध खुनाचा गुन्हा दाखल!

छत्रपती संभाजीनगर (सीएससीएन वृत्तसेवा) : विवाहित प्रियकराचा साथीदारांच्या मदतीने खून करून मृतदेह गोदापात्रात फेकल्याची धक्कादायक घटना छत्रपती संभाजीनगरमध्ये समोर आल्याने खळबळ उडाली आहे. मृतक तरुणाच्या भावाने याप्रकरणात पोलिसांत तक्रार दिली आहे. त्‍यावरून पोलिसांनी रविवारी (१७ ऑगस्ट) प्रेयसीविरुद्ध गुन्हा दाखल केला आहे.

सचिन पुंडलिक औताडे (वय ३२, रा. कोलठाणवाडी रोड, शिवनेरी कॉलनी, हर्सूल) असे हत्‍या झालेल्या प्रियकराचे नाव आहे, तर भारती रवींद्र दुबे (रा. कॅनॉट प्लेस, सिडको) असे गुन्हा दाखल झालेल्या प्रेयसीचे नाव आहे. राहुल पुंडलिक औताडे (वय ३५, रा. कोलठाणवाडी रोड, शिवनेरी कॉलनी, हर्सूल, छत्रपती संभाजीनगर) यांनी या प्रकरणात अहिल्यानगर जिल्ह्यातील शेवगाव पोलीस ठाण्यात तक्रार दिली आहे. ते पत्नी जिजाबाई, वडील पुंडलिक, आई जनाबाई, भावजय भक्ती यांच्यासह राहतात. हे कुटुंब शेती करून उदरनिर्वाह करते. त्यांचा भाऊ सचिन हाही शेती करत होता. ३१ जुलैला दुपारी साडेबाराच्या सुमारास तो राहत्‍या घरातून कोणाला काही एक न सांगता मोटारसायकलीवरून (एमएच २० एएफ ५६५१) निघून गेला होता.

कुटुंबीयांनी त्‍याचा सगळीकडे शोध घेतला. मात्र तो मिळून आला नव्हता. त्‍यामुळे तो हरवल्याची तक्रार वडील पुंडलिक हरिभाऊ औताडे (वय ६९) यांनी हर्सूल पोलीस ठाण्यात ४ ऑगस्टला केली होती. बुधवारी (१३ ऑगस्ट) शेवगाव पोलिसांनी राहुल औताडे यांना कॉल करून कळवले, की मुंगी (ता. शेवगाव जि. अहिल्यानगर) गावच्या ह‌द्दीत सदाशिव राजेभोसले यांच्या शेतजमिनीच्या कडेला असलेल्या गोदावरी नदीचे पात्रात सचिनचा मृतदेह आढळला आहे. औताडे कुटुंबीय पोहोचेपर्यंत मृतदेहाची उत्तरीय तपासणी करून बेवारस म्‍हणून दफनविधीही करण्यात आला होता.

सचिन याचे भारती रवींद्र दुबे (रा. कॅनॉट प्लेस, सिडको, छत्रपती संभाजीनगर) हिच्यासोबत चार वर्षांपासून प्रेमसंबंध होते. भारती दुबे हिचे इतर पुरुषांसोबत देखील संबंध असल्याने त्या दोघांत नेहमी वाद होत असायचे. सचिन गायब घरातून निघून गेल्यानंतर त्‍याचा शोध घेत राहुल औताडे हे चौकशी करत असताना त्‍यांना भारती व सचिनच्या एका कॉमन मित्राने सांगितले होते, की ३१ जुलैला दुपारनंतर सचिन व भारती हे लग्न समारंभासाठी भारतीच्या गाडीमधून जालना येथे गेले. पुन्हा सायंकाळी सातला भारतीच्या राहत्या घरी आले होते. तिच्या घरात रात्री दोघेही दारू पिले. सचिन तेथेच थांबला होता. त्‍यामुळे राहुल यांना दाट संशय आहे, की सचिन व भारती यांच्यात वाद होऊन भारतीने तिच्या साथीदारांच्या मदतीने सचिनचा घातपात करून जीवे मारून पुरावा नष्ट करण्याच्या उ‌द्देशाने मृतदेह गोदावरी नदीपात्रात फेकून दिला असावा. अधिक तपास पोलीस निरीक्षक संतोष मुटकुळे करत आहेत.