गोविंदा पथकांत राडा; बेदम मारहाण तिसऱ्यालाच, लोखंडी वस्‍तूने मारून केले रक्‍तबंबाळ!; टीव्ही सेंटरजवळ काय घडलं...

छत्रपती संभाजीनगर (सीएससीएन वृत्तसेवा) : दोन गोविंदा पथकांत राडा झाला. त्‍याचवेळी दुसऱ्याच एका २९ वर्षीय तरुणाला तो भांडण झालेल्या पथकाचा असल्याचे समजून तीन-चार तरुणांनी बेदम मारहाण केली. लोखंडी वस्‍तूने मारून रक्‍तबंबाळ केले. त्‍याला वाचवायला धावलेल्या आणखी एका तरुणालाही मारहाण करून जखमी केले. ही घटना शनिवारी (१६ ऑगस्ट) रात्री साडेआठला टीव्ही सेंटरजवळील एम टूकडे जाणाऱ्या रोडवरील रिक्षास्टॅण्डजवळ घडली.

कुणाल जगदेव तायडे (वय २९, रा. नारळीबाग पावन गणपती मंदिराजवळ) असे जखमी तरुणाचे नाव आहे. त्याला वाचवायला धावलेल्या मित्र मयूर शरद गायकवाड (वय २६, रा. भीमनगर भावसिंगपुरा) हाही जखमी झाला आहे. कुणाल हा आई, भाऊ व वहिनीसह राहतो. सध्या शिक्षण घेत आहे. शनिवारी (१६ ऑगस्ट) रात्री साडेआठला कुणाल व त्याचा मित्र मयूर शरद गायकवाड (वय २६, रा. भीमनगर भावसिंगपुरा) हे त्‍यांचे श्री बालकृष्णा गोविंदा पथक घेऊन टीव्ही सेंटर येथे दहीहंडी फोडण्यासाठी आले होते. जिजाऊ चौक येथील जय श्रीराम दहीहंडीसाठी त्‍यांच्या पथकाने थर लावले. त्यानंतर हे पथक पुढे टीव्ही सेंटरकडे निघाले. मागून भूमिपूत्र गोविंदा पथक आले. त्यात कुणालचे मित्र असल्याने तो त्यांना भेटण्यासाठी जिजाऊ चौकात एम टूकडे जाणाऱ्या रोडवरील रिक्षास्टॅण्डजवळ आला. त्या ठिकाणी अगोदरच दोन गोविंदा पथकांमध्ये वाद चालू होता.

कुणाल त्या ठिकाणी गेलो तेथील तीन- चार मुलांना वाटले की कुणालही त्यांचे भांडण झालेल्या पथकातील आहे. त्‍यामुळे त्‍यांनी कुणाललाच बेदम मारहाण करत डोक्याच्या मागील बाजूस लोखंडी वस्तूने मारून जखमी केले. कुणालचा मित्र मयूर गायकवाड त्याला सोडविण्यासाठी आला असता त्यानाही तीन-चार मुलांनी शिवीगाळ करून हाताचापटाने मारहाण केली. टोकदार वस्तूने मयूरच्या उजव्या बाजूला पाठीवर मारून जखमी केले. मयूरने कुणालला रिक्षात टाकून घाटी रुग्णालयात आणले. तेथे उपचार घेतल्यानंतर रविवारी कुणालने सिडको पोलीस ठाण्यात तक्रार दिली. त्‍यावरून पोलिसांनी तीन ते चार अनोळखी मुलांविरुद्ध गुन्हा दाखल केला असून, त्‍यांची ओळख पटविण्याचे काम सुरू आहे.