खळबळजनक : सिद्धार्थच्या हत्‍येनंतर आता चुलतभाऊ स्वप्नीलचा मृतदेह विहिरीत आढळल्‍याने गंगापूर हादरले!

गंगापूर (गणेश म्‍हैसमाळे : सीएससीएन वृत्तसेवा) : चक्रावून टाकणाऱ्या घटना लागोपाठ गंगापूर तालुक्यातील मुद्देशवाडगावमध्ये घडल्या आहेत. १४ ऑगस्टला सिद्धार्थ विजय चव्हाण (वय १२) याची हत्‍या करून मृतदेह विहिरीत फेकण्यात आला होता. त्यानंतर चारच दिवसांत त्‍याचा चुलत भाऊ स्वप्नील संजय चव्हाण (वय २३) याचाही मृतदेह आज, १८ ऑगस्टला दुपारी परिसरातील विहिरीत आढळल्याने खळबळ उडाली आहे.

सिद्धार्थचा खून कुणी का व कशासाठी केला हे अद्याप समोर आलेले नसताना स्वप्नीलची हत्‍या झाली की आणखी काही, याबद्दल शंका-कुशंका व्यक्‍त केल्या जात आहेत. घातपाताची दाट शक्‍यता वर्तवली जात आहे. स्वप्नील जनावरांसाठी चारा आणायला गेला होता. तो घरी न परतल्याने कुटुंबीयांनी शोध सुरू केला. हकीकतपूर शिवारातीलच संतोष गंगाधर चव्हाण यांच्या गट क्रमांक १८ मधील शेतातील विहिरीत त्याचा मृतदेह तरंगताना दिसला.

सरपंच योगेश तारू यांनी कळवताच गंगापूर पोलिसांनी तातडीने घटनास्‍थळी धाव घेतली. ग्रामस्थांच्या मदतीने मृतदेह बाहेर काढून गंगापूरच्या उपजिल्हा रुग्णालयात आणला. उत्तरीय तपासणीनंतर स्वप्नीलची हत्‍या झाली की त्‍याने आत्‍महत्‍या केली, हे समोर येईल. स्वप्नीलच्या पश्चात आई-वडील व मोठा भाऊ आहे. दोन चुलत भावांचे मृतदेह विहिरीत आढळल्याने गाव भयग्रस्त झाले आहे. आता गंगापूर पोलिसांसमोर तपासाचे मोठे आव्हान उभे ठाकले आहे.

सिद्धार्थची हत्‍या कशी केली होती?
सिद्धार्थच्या हत्‍येप्रकरणी त्‍याची आई सुरेखा विजय चव्हाण (वय ४०, रा. हकीकतपूर वस्ती, मुद्देशवाडगाव) यांच्या तक्रारीवरून गंगापूर पोलिसांनी शुक्रवारी (१५ ऑगस्ट) खुनाचा गुन्हा दाखल केला होता. सिद्धार्थ गुरुवारी (१४ ऑगस्ट) दुपारी तीनला किराणा सामान आणण्यासाठी शेतवस्तीवरून मु‌द्देशवाडगाव गावाकडे सायकलने जात होता. त्यावेळी खुन्याने त्‍याला दत्तू भुसारे यांच्या मकाच्या शेतात नेले. तिथे सिद्धार्थच्या डोक्यात मारून व गळा दाबून ठार केले. नंतर मृतदेह भरत दारूंटे यांच्या विहिरीतील पाण्यात फेकून दिल्याचे तक्रारीत म्‍हटले होते. या खुनाच्या गुन्ह्याचा तपास अद्याप पूर्णत्‍वास गेला नसतानाच आता स्वप्नीलचा मृतदेह आढळला आहे.