उभ्या ट्रकला दुचाकी धडकून माजी ग्रामपंचायत सदस्यांचा मृत्‍यू, सिल्लोडची दुर्दैवी घटना

सिल्लोड/कन्नड (मेट्रोपोलिस पोस्ट वृत्तपत्राच्या सौजन्याने ) : सिल्लोड तालुक्‍यातील लिहाखेडी येथे उभ्या ट्रकला दुचाकी धडकून माजी ग्रामपंचायत सदस्याचा मृत्‍यू झाला, तर कन्‍नड तालुक्‍यातील करंजखेड येथे आयशरच्या धडकेने ऑटोरिक्षातील २ महिला गंभीर जखमी झाल्या.

घटना पहिली : सिल्लोड लिहाखेडीचे माजी ग्रामपंचायत सदस्य कृष्णा लक्ष्मण फरकाडे (वय ४४) सिल्लोड -अजिंठा रस्त्याने गोळेगावहून लिहाखेडीला येत होते. लिहाखेडी शिवारात उभ्या ट्रकला दुचाकी मागून धडकली. यात फरकाडे यांचा जागीच मृत्‍यू झाला. ही घटना मंगळवारी (२ सप्‍टेंबर) रात्री १० च्या सुमारास घडली. गावकऱ्यांनी त्यांना तत्काळ सिल्लोड उपजिल्हा रुग्णालयात दाखल केले. मात्र डॉक्टरांनी तपासून मृत घोषित केले.

घटना दुसरी : बुधवारी (३ सप्टेंबर) सायंकाळी ५:३० वाजण्याच्या सुमारास  करंजखेड-नागापूर मार्गावर करंजखेड (ता. कन्‍नड) येथे आयशर वाहनाने ऑटो रिक्षाला उडवले. यात रिक्षातील दोन महिला गंभीर जखमी झाल्या. प्रतिभा बाळासाहेब पवार व विमलताई ताजणे (रा. करंजखेड) अशी गंभीर जखमी महिलांची नावे आहेत. तिघांना किरकोळ मार लागला आहे. नागापूर येथून रिक्षाने ४ महिला व रिक्षाचालक असे पाचजण करंजखेडला घरी येत होते. करंजखेड गावाजवळील वळणावर करंजखेडकडून नागापूरकडे अद्रक भरण्यासाठी सुसाट निघालेल्या आयशरने रिक्षाला उडवले. रिक्षाने तीन पलट्या खाल्ल्या. प्रतिभा पवार आणि विमलताई ताजणे यांना छत्रपती संभाजीनगर येथील खासगी रुग्णालयात उपचारासाठी दाखल केले आहे. अन्य ३ जखमींवर कन्नड येथील ग्रामीण रुग्णालयात उपचार करून घरी पाठविण्यात आले. अपघातानंतर ग्रामस्थांनी आयशर चालकाला पकडून पिशोर पोलिसांच्या ताब्यात दिले.