एका युवकासोबतची छायाचित्रे व्हायरल झाल्याने महिला हादरली!; सायबर पोलिसांनी शोधून काढले बदनामी करणारे दोघे!, छ. संभाजीनगरची धक्कादायक घटना

By City News Desk

On 06 Sep 2025

एका युवकासोबतची छायाचित्रे व्हायरल झाल्याने महिला हादरली!; सायबर पोलिसांनी शोधून काढले बदनामी करणारे दोघे!, छ. संभाजीनगरची धक्कादायक घटना

छत्रपती संभाजीनगर (सीएससीएन वृत्तसेवा) : इन्स्टाग्रामवर एका महिलेचे दोन बनावट खाते तयार करून, त्यावर तिचे एका युवकासोबतची छायाचित्रे व अश्लील मजकूर लिहित बदनामी करण्यात आल्याचा धक्कादायक प्रकार पदमपुऱ्यात समोर आला आहे. वेदांतनगर पोलिसांनी दोघांविरुद्ध शुक्रवारी (५ सप्‍टेंबर) गुन्हा दाखल केला आहे.

पदमपुऱ्यात राहणाऱ्या ३७ वर्षीय महिलेने या प्रकरणात तक्रार दिली आहे. पतीशी तिचा वाद असल्याने ती पाच वर्षांपासून आई व दोन मुलांसह वेगळी राहते. तिच्या मावस भावाने कॉल करून सांगितले, की तुझे एका युवकासोबचे छायाचित्रे इन्स्टाग्रामवर व्हायरल झाले आहेत. या महिलेच्या नावाने बनावट अकाऊंट तयार करून दोघांचे फोटो टाकून त्याखाली आक्षेपार्ह कमेंट केलेली होती, तर आणखी एक बनावट अकाऊंट तयार करून दोघांचा फोटो व त्याखाली अश्लील मजकूर लिहिलेला होता.

त्यानंतर महिलेने सायबर पोलीस ठाण्यात तक्रार दिली. त्यावरून पोलिसांनी तपास केला असता इन्स्टाग्रामवर बनावट अकाऊंट उघडून बदनामी करणाऱ्यांची नावे समोर आली. त्यातील एका मोबाइलधारकाचे नाव संजन उत्तम काकडे (रा. उत्तरवाडी, छत्रपती संभाजीनगर) तर दुसऱ्या मोबाइल धारकाचे नाव आहे गणेश श्रीराम चौधरी (रा. दुधड ता. छत्रपती संभाजीनगर) असे समोर आले. महिलेच्या तक्रारीवरून दोघांविरुद्ध गुन्हा दाखल केला आहे. अधिक तपास पोलीस निरीक्षक प्रविणा यादव करत आहेत.