ब्‍युटीपार्लरवालीसोबत पतीचे अफेअर, विवाहितेचा आरोप, घरातून हाकलून दिल्याने माहेरी छत्रपती संभाजीनगरला राहते, जवाहरनगर पोलिसांना सांगितली लग्नापासूनची आपबिती!

छत्रपती संभाजीनगर (सीएससीएन वृत्तसेवा) : ब्‍युटी पार्लरवालीसोबत पतीचे अफेअर असल्याने त्याच्याकडून शारीरिक व मानसिक छळ केला जात असून, घर बांधकामासाठी ५ लाख रुपये माहेरावरून आणण्यास सांगण्यात येत आहे. घरातून हाकलून दिल्याची तक्रार २६ वर्षीय विवाहित तरुणीने जवाहरनगर पोलीस ठाण्यात केली आहे. पोलिसांनी तिचा पती, सासू, जेठ, जेठानी, ३ नणंदांविरुद्ध बुधवारी (३ सप्टेंबर) गुन्हा दाखल केला आहे.

सध्या माहेरी गारखेड्यातील प्रियदर्शनी कॉलनीत राहणाऱ्या तरुणीचे लग्न २२ मे २०१७ रोजी सेलूद (ता. भोकरदन) येथील एका व्यापाऱ्यासोबत झाले होते. लग्नानंतर दोन ते तीन महिने तिला सासरच्यांनी चांगले वागवले. नंतर पती, सासू, जेठ, जेठानी, ३ नणंदा म्हणू लागल्या, की तुझ्या आई-वडिलांनी लग्न चांगले केले नाही. मानपान दिला नाही. विवाहितेच्या आई-वडिलांनी तिच्या सासरच्यांना समजावून सांगितले. त्यानंतर त्यांनी थोडे दिवस विवाहितेला चांगले वागवले. तिला पतीपासून दोन मुली झाल्या. त्यानंतर सासरच्यांनी तुला मुलीच का झाल्या, मुलगा का झाला नाही, असे म्हणून तिला शिवीगाळ करून शारीरिक व मानसिक छळ सुरू केला.

तू घर बांधण्यासाठी तुझ्या आई-वडिलांकडून ५ लाख रुपये घेऊन ये, असे म्हणून तिला पती, सासू, जेठ, जेठानी, ३ नणंदा मारहाण करू लागले. याचदरम्यान विवाहितेला कळले, की तिच्या पतीचे भोकरदन तालुक्यातीलच एका गावात ब्युटी पार्लर चालवणाऱ्या महिलेसोबत अनैतिक संबंध आहेत. विवाहितेने याबद्दल विचारणा केली असता पतीने तिला शारीरिक व मानसिक त्रास देणे वाढवले. ४ एप्रिल २०२५ रोजी तिला घरातून हाकलून दिले. तेव्हापासून ती माहेरी छत्रपती संभाजीनगरला राहत आहे. अधिक तपास पोलीस अंमलदार अनिता उपाधे करत आहेत.