गल्लीत जिकडे तिकडे भटके कुत्रे, वैतागलेल्या दोघांनी लोखंडी रॉडने मारून पिटाळले, कुत्र्यांचे ‘लाड’ करणाऱ्या महिलेलाही धमकावले!, सिटी चौक परिसरातील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : भटक्‍या कुत्र्यांमुळे वैतागलेल्या दोघांनी, ज्‍या महिलेच्या आसऱ्याने कुत्रे गल्लीत जमतात, त्यांना धमकावले. गल्लीतील कुत्र्यांना लोखंडी रॉडने मारून पिटाळले. सिटी चौक पोलिसांनी महिलेच्या तक्रारीवरून दोघांविरुद्ध गुन्हा दाखल केला आहे.

समाजसेविका मुमताज बशीर खान पठाण (वय ५०, रा. गणेश कॉलनी) यांनी या प्रकरणात तक्रार दिली आहे. त्या भटक्या कुत्र्यांसाठी काम करतात. पठाण दिलावर खान हे त्यांच्याच गल्लीत कुटुंबासह राहतात. सोमवारी (१ सप्‍टेंबर) संध्याकाळी साडेसहाला मुमताज या अंगणाची साफसफाई करत होत्या. त्याचवेळी पठाण दिलावर खान यांच्या घराच्या ओट्यावर गल्लीतील एक भटका कुत्रा बसलेला होता. दिलावर यांच्या लहान मुलाला पाहून कुत्रा भुंकला. मुलगा गल्लीत मुमताज यांच्याकडे येऊन थांबला. त्यानंतर मुमताज यांनी मुलाला त्याच्या घरी नेऊन सोडले. त्यानंतर संध्याकाळी साडेसातला  पठाण दिलावर खान यांनी शेजाऱ्यांच्या घराच्या ओट्यावर गल्लीतील भटके कुत्रे बसलेले पाहून हातातील लोखंडी रॉडने भटक्या कुत्र्यांना मारहाण केली.

त्यामुळे ते भटके कुत्रे तेथून भुंकत पळून गेले. त्यानंतर दिलावर खान पठाण यांनी मुमताज यांच्या घरासमोर येऊन म्हणाला, की "तुझे पाय तोडून टाकीन. तुझे वाईट हाल करील. मी औरंगाबाद शहर जिल्हा काँग्रेसचा पदाधिकारी आहे, अशी धमकी दिली. त्यावेळी त्यांचा भाऊ दिलदारखान पठाण यांनीही हातात लोखंडी रॉड घेऊन गल्लीतील कुत्र्यांला मारून हाकलून दिले. गल्लीत ओरडून सांगितले की, "गल्ली में एक भी भटका कुत्ता दिखना नही, गल्ली में कुत्तो को बैठने देने का नहीं, असे बोलून तेथून निघून गेले. अधिक तपास पोलीस अंमलदार विनोद नितनवरे करत आहेत.