इंडोरन्स कंपनीच्या सुसाट बसने महिलेला उडवले, ए. एस. क्लबजवळील घटना

By City News Desk

On 06 Sep 2025

इंडोरन्स कंपनीच्या सुसाट बसने महिलेला उडवले, ए. एस. क्लबजवळील घटना

छत्रपती संभाजीनगर (सीएससीएन वृत्तसेवा) : इंडोरन्स कंपनीच्या सुसाट बसने विरुद्ध दिशेने येत मॉर्निंग वॉक करणाऱ्या महिलेला उडवले. यात महिलेला गंभीर दुखापत झाली आहे. वाळूज एमआयडीसी पोलिसांनी बसचालकाविरुद्ध गुन्हा दाखल केला आहे. ही घटना ए. एस. क्लबजवळील म्हाडा कॉलनीतील चौफुलीवर घडली. मंगळवारी (२ सप्‍टेंबर) सकाळी साडेआठला घडली.

बसचालक दिलीप सुराजी भुले (वय ४०, रा. ओम साईनगर, रांजणगाव शेणपुंजी, ता. गंगापूर) असे गुन्हा दाखल झालेल्या बसचालकाचे नाव आहे. कलावती हिरामण वाहुळे (वय ६०, रा. सिद्धी विनायक रो हाऊस, ए. एस. क्लबजवळ, छत्रपती संभाजीनगर) असे जखमी वृद्धेचे नाव आहे. त्यांच्यावर सध्या स्वामी समर्थ हॉस्पिटलमध्ये उपचार सुरू आहेत. त्या शिलाई मशीन, विणकाम करून कुटुंबाचा उदरनिर्वाह चालवितात.

मंगळवारी (२ सप्‍टेंबर) सकाळी साडेआठला त्या मॉर्निंग वॉकला घराबाहेर पडल्या होत्या. म्हाडा कॉलनीजवळील चौफुली येथून परतत असताना इंडोरन्स कंपनीची बस (MH 20 GC 8253) राँगसाईडने आली व कलावती वाहुके यांना मागून धडक दिली. ही बस दिलीप भुले हे चालवत होते. त्यांनी हलगर्जीपणाने बस चालवून धडक देत गंभीर जखमी केल्याने कलावती यांनी तक्रारीत म्हटले आहे. त्यामुळे त्यांच्या उजवा खांदा व उजव्या पायास गंभीर दुखापत होऊन फ्रॅक्चर झाले. अधिक तपास पोलीस अंमलदार तुकाराम पवार करत आहेत.