पाऊस नसल्याने पीक पिवळे पडले, सिल्लोडमध्ये शेतकऱ्याची आत्‍महत्‍या

सिल्लोड (सीएससीएन वृत्तसेवा) : बहुली (ता. सिल्लोड) येथे पाऊस नसल्याने मका पिक पिवळे पडले. त्‍यामुळे चिंताग्रस्त शेतकऱ्याने राहत्या घरात गळफास घेऊन आत्महत्या केली. ही घटना शुक्रवारी (१८ जुलै) संध्याकाळी सातला घडली. अजिंठा पोलिसांनी या घटनेची नोंद मंगळवारी (२२ जुलै) सायंकाळी घेतली.

तुकाराम तायराम डवणे (वय ४९, रा. बहुली) असे आत्‍महत्‍या केलेल्या शेतकऱ्याचे नाव आहे. डवणे हे अल्पभूधारक आहेत. त्‍यांच्याकडे अडीच एकर शेती असून, बँकेचे एकूण ३ लाख ९५ हजार रुपयांचे कर्ज आहे. १५ दिवसांपासून पाऊस नसल्याने शेतात मका पिवली पडली असून, दुबार पेरणीचे संकट निर्माण झाले आहे. आधीच कर्जाचा डोंगर आणि दुबार पेरणीचे संकट यामुळे ते चिंताग्रस्त झाले होते. त्यांनी घरात गळफास लावून घेतला. ही बाब लक्षात येताच कुटुंबीय आणि ग्रामस्थांनी त्यांना सिल्लोड ग्रामीण रुग्णालयात आणले. मात्र डॉक्टरांनी तपासून मृत घोषित केले. त्यांच्या पश्चात पत्नी, चार मुली, आई, पाच भाऊ, भावजई, दोन बहिणी, जावई, असा परिवार आहे.

कुंभेफळमध्ये १७ वर्षीय मुलाची आत्‍महत्‍या
छत्रपती संभाजीनगर तालुक्‍यातील कुंभेफळ येथे १७ वर्षीय मुलाने राहत्या घरी गळफास घेऊन आत्महत्या केल्याची धक्कादायक घटना मंगळवारी (२२ जुलै) दुपारी तीनला घडली. आकाश अंशीराम रामपिसे असे आत्‍महत्‍या केलेल्याचे नाव आहे. आकाश आई-वडिलांसह कुंभेफळमध्ये राहत होता. आकाशने गळफास घेतल्याचे लक्षात येताच त्याचा मोठा भाऊ संदेशने तातडीने त्‍याला फासावरून काढून घाटी रुग्णालयात दाखल केले. डॉक्टरांनी तपासून मृत घोषित केले. आकाशच्या आत्‍महत्‍येचे कारण अद्याप समोर आलेले नाही.