लाचखोर तलाठी अक्षय बिनीवाले, कोतवाल सोमनाथ कोल्हे ACB च्या जाळ्यात!, पैठण तहसील कार्यालयात कारवाई

पैठण (सीएससीएन वृत्तसेवा) : तलाठी अक्षय बबनराव बिनीवाले (वय ३०, रा. म्हाडा कॉलनी, पैठण) व कोतवाल सोमनाथ राघू कोल्हे (वय ३६, रा. आपेगाव, ता. पैठण) या दोन लाचखोरांना लाचलुचपत प्रतिबंधक विभागाने (एसीबी) सोमवारी (४ ऑगस्ट) दुपारी चारला पैठण तहसील कार्यालयात ८ हजारांची लाच घेताना रंगेहात पकडले. शेतजमिनीचे वाटणीपत्र तयार करून देण्यासाठी त्‍यांनी स्वीकारली.

बिनीवाले आणि कोल्हे या लाचखोरांची तक्रार एका शेतकऱ्याने एसीबीच्या अधीक्षक माधुरी कांगणे यांच्याकडे तक्रार केली होती. शेतकऱ्याची पैठण तालुक्यातील आगर नांदरच्या गट क्र. ५८ मध्ये ५० आर सामायिक शेतजमीन असून, त्‍यातील १६ आर जमीन शेतकऱ्याच्या नावावर येते. २५ जुलै रोजी त्यांनी जमिनीच्या वाटणीपत्रासाठी तलाठी कार्यालयात अर्ज केला होता. वाटणीपत्र करून देण्यासाठी कोल्हे याने बिनीवालेच्या नावाने १० हजार रुपयांची मागणी केली.

पोलीस निरीक्षक चैनसिंग गुसिंगे, धर्मराज बांगर यांनी लाचेच्या मागणीची खातरजमा केली. कोल्हेने तडजोडीअंती ८ हजार स्वीकारण्याची तयारी दर्शवली. कोल्हेने बिनीवालेला कॉल करून याबाबत विचारणाही केली. कोल्हेने पैसे घेताच ठरल्याप्रमाणे शेतकऱ्याने खांद्यावरचा गमछा खाली उतरवला अन्‌ एसीबीच्या पथकाने कोल्हेवर झडप घातली. ही कारवाई गुसिंगे, बांगर यांच्यासह अंमलदार राजेंद्र नंदिले, युवराज हिवाळे, सी. एन. बागूल यांनी केली. बिनीवालेलासुद्धा लगेचच ताब्‍यात घेण्यात आले. दोघांविरुद्ध पैठण पोलीस ठाण्यात गुन्हा दाखल केला आहे.