धक्‍कादायक : नोकरीवरून घरी परधर्मीय सरांच्या दुचाकीवरून येण्यास निघाली, एक जण आला, दोघांना बेदम चोपले, तिच्या नाकावर ठोसा मारून फ्रॅक्‍चर केले!, टीव्ही सेंटरवर वाचा काय घडलं...

छत्रपती संभाजीनगर (सीएससीएन वृत्तसेवा) : कंपनीत सहकारी असलेल्या परधर्मीय तरुणांसोबत बोलणे आणि परधर्मीय वरिष्ठ तरुणाच्या गाडीवर बसून घरी येण्यास निघालेल्या तरुणीला ही बाब चांगलीच महागात पडली. एक तरुण दोघांकडे आला. नावे विचारली आणि दोघांना बेदम मारहाण केली. तिच्या नाकावर ठोसा लगावून नाक फ्रॅक्‍चर केले. जीवे मारण्याची धमकी देऊन निघून गेला. हा धक्कादायक प्रकार टीव्ही सेंटरवर गुरुवारी (३१ जुलै) रात्री साडेआठच्या सुमारास घडला.

याप्रकरणात २० वर्षीय तरुणीने तक्रार दिली आहे. ती हर्सूल सावंगी येथे नायगाव रोडवर राहते. तिचे वडील ज्या खासगी कंपनीत काम करतात, तिथेच तीही दोन महिन्यांपासून पॅकिंगचे काम करते. ड्युटी संपल्यानंतर कंपनीच्या बसने गुरुवारी रात्री साडेआठच्या सुमारास टीव्ही सेंटर येथे आली. तिथून कंपनीत सहकारी असलेल्या परधर्मीय एक तरुण व एका तरुणीशी बोलून ती रिक्षा स्टँडजवळ आली. तिथे तिचे कंपनीत वरिष्ठ सहकारी असलेल्या परधर्मीय तरुणाच्या गाडीवर बसून घरी जाणार होती. त्‍यासाठी ती त्‍यांच्या गाडीकडे येत असताना एक युवक  तोंडाला रुमाल बांधून आला. त्याने दोघांना नावे विचारली. तिने अमीना (नाव बदलले आहे) आणि त्‍याने अमोल (नाव बदलले आहे ) नाव सांगताच युवकाचा संताप अनावर झाला.

अमोलला हाताचापटाने मारहाण करून नंतर तो तरुणीकडे आला. तू गैर लोकांसोबत का बोलते? असे म्हणून त्‍याने तरुणीच्या नाकावर जोराचा बुक्का मारून जबर दुखापत केली. तिला हाताचापटाने मारहाण करू लागला. तेव्हा तिच्या नाकातून रक्तस्‍त्राव होऊन ती खाली पडली. नंतर त्याने शिवीगाळ करून जीवे मारण्याची धमकी दिली. व तिथून पळून गेला. तरुणीने आईला कॉल करून घडलेला प्रकार सांगितला. तेव्हा तिचे नातेवाइक व आई त्या ठिकाणी आले. नातेवाइकांनी तिला रिक्षात बसवून मेडीकव्हर हॉस्पिटलमध्ये उपचारासाठी नेले. डॉक्टरांनी सांगितले, की तिच्या नाकाचे हाड फ्रॅक्चर झाले आहे. मेडीकव्हर हॉस्पिटलमध्ये उपचार घेतल्यानंतर तिने सिडको पोलीस ठाण्यात येऊन तक्रार दिली. पोलिसांनी मारहाण करणाऱ्या तरुणाविरुद्ध गुन्हा दाखल केला आहे. अधिक तपास पोलीस अंमलदार देविदास राठोड करत आहेत.