ट्रकमधून ५० गॅस सिलिंडरची चोरी, नारेगावमधील कबीर चौकातील घटना

छत्रपती संभाजीनगर (सीएससीएन वृत्तसेवा) : सिडको एमआयडीसीतील नारेगाव येथील कबीर चौकात उभ्या ट्रकमधून चोरट्यांनी ५० गॅस सिलिंडर गायब केले आहेत. दीड लाख रुपयांचे सिलिंडर चोरीला गेल्याची तक्रार ट्रकमालकाने सिडको एमआयडीसी पोलीस ठाण्यात रविवारी (३ ऑगस्ट) केली. त्‍यावरून पोलिसांनी चोरट्यांविरुद्ध गुन्हा दाखल करून तपास सुरू केला आहे. 

नारायण शंकरराव खरात (वय ६३, रा. रामगोपालनगर पडेगाव) यांनी या प्रकरणात तक्रार दिली आहे. त्‍यांचे वाळूज येथे गॅस सिलिंडर ट्रान्सपोर्टचे ऑफिस असून नारेगाव येथील हिंदुस्थान पेट्रोलियम कॉर्पोरेशन कंपनीमधून भरलेले घरगुती गॅस सिलिंडर घेऊन ते विविध जिल्ह्यांतील कंपनीच्या वितरकांकडे विक्रीसाठी नेऊन देण्याचे काम करतात. त्‍या बदल्यात कंपनीकडून त्‍यांना गाडी भाडे दिले जाते. त्‍यांच्या मालकीच्या ७ ट्रक आहेत.

बुधवारी (३० जुलै) रात्री ९ ला त्‍यांची ट्रान्सपोर्टची गाडी (MH 20 DE8959) हिंदुस्थान पेट्रोलियम कार्पोरेशन कंपनी नारेगाव येथून चालक जुबेर अहेमद मोहम्मद अब्दुल नसीर (वय ५९) याच्या ताब्‍यात दिलेली होती. त्‍यात ३४२ भरलेले घरगुती गॅस सिलिंडर होते. अकोला जिल्ह्यात हे सिलिंडर नेऊन दिल्यानंतर रिकामे सिलिंडर घेऊन तो पुन्हा छत्रपती संभाजीनगरला आला. शुक्रवारी (१ ऑगस्ट) मध्यरात्री त्‍याने ट्रक पार्किंगसाठी जागा न मिळाल्याने नारेगावजवळील कबीर चौकात लावली होती. रात्रीतून चोरट्यांनी ट्रकमधून दीड लाख रुपये किंमतीचे ५० रिकामे सिलिंडर चोरून नेले. ही शनिवारी (२ ऑगस्‍ट) सकाळी समोर आली. अधिक तपास पोलीस अंमलदार रमेश तांबोरे करत आहेत.