पतीच्या विवाहबाह्य संबंधामुळे वैतागलेल्या ३० वर्षीय विवाहितेने घेतली बिडकीन पोलीस ठाण्यात धाव!

बिडकीन, ता. पैठण (सीएससीएन वृत्तसेवा) : पतीच्या विवाहबाह्य संबंधांना विरोध केल्याने ३० वर्षीय विवाहितेला जाच सुरू झाला. दिवसेंदिवस तो वाढत गेल्याने अखेर विवाहितेने बिडकीन पोलीस ठाण्यात तिसऱ्यांदा धाव घेत तक्रार दिली आहे. त्‍यावरून पोलिसांनी तिच्या पतीविरुद्ध ८ ऑगस्टला गुन्हा दाखल केला आहे.

चितेगाव (ता. पैठण) येथील ३० वर्षीय विवाहितेने या प्रकरणात तक्रार दिली आहे. ती खासगी कंपनीत नोकरी करते. तिचे लग्‍न चितेगाव येथील युवकासोबत झाले होते. लग्नानंतर ती सासरी पती, सासू, सासऱ्यांसोबत राहत होती. तिचा पती खासगी कंपनीत नोकरीला आहे. तो कामानिमित्त १०-१० दिवस घराबाहेर राहत होता. लग्नाच्या एक वर्षानंतर पती व सासऱ्यांत घरगुती कारणावरून वाद झाल्याने विवाहिता आणि तिचा पती वेगळे निघाले. सुरुवातीचे चार वर्षे पतीने तिला चांगली वागणूक दिली.

सन २०१२ मध्ये तिला पतीचे बाहेर अनैतिक संबंध असल्याचे कळले. तिने पतीला जाब विचारला असता त्याने तिला लाथाबुक्क्यांनी मारहाण केली होती. तेव्हा तिच्या माहेरच्या लोकांनी मध्यस्थी केली होती. नंतरचे काही दिवस सुरळीत चालले. मात्र नंतर पुन्हा पती व तिच्यात पतीच्या बाहेरच्या संबंधामुळे वाद सुरू झाले. तिला व तिच्या मुलांना मारहाण करायचा. त्याच्यापासून तिला एक मुलगी व दोन मुले आहेत. तिने पतीविरुद्ध यापूर्वी बिडकीन पोलीस ठाण्यात दोनदा तक्रारी दिल्या. तरीही त्‍याच्यात काही फरक पडला नाही. केस केली म्हणून उलट तो आणखीनच त्रास देऊ लागला. पतीच्या वागणुकीत काहीही बदल होत नसल्याने त्याच्यापासून मला व मुलांना धोका असल्याचे तक्रारीत विवाहितेने म्‍हटले आहे.