सेव्हल हिल्स- सुतगिरणी चौक- दर्गा चौक रस्‍त्‍यावरील मार्किंग पूर्ण, आज गाडे चौकापर्यंत मार्किंग करणार, हर्सूलमध्ये पक्‍की अतिक्रमणे केली जमीनदोस्त

छत्रपती संभाजीनगर (सीएससीएन वृत्तसेवा) : सेव्हल हिल्स- सुतगिरणी चौक-शहानूरमियाँ दर्गा चौक या रस्‍त्‍यावर दोन्ही बाजूंच्या अतिक्रमणांवर महापालिकेच्या नगररचना विभागाच्या पथकाने बुधवारी (२३ जुलै) मार्किंग केली. अनेक ठिकाणी कुंपने, टीनशेड, पायऱ्या अतिक्रमणात आहेत. त्‍यांना स्वतःहून ते हटविण्याचे आदेश दिले आहेत. ९९ टक्‍के मालमत्ताधारकांनी बांधकाम परवानगी घेऊन ३० आणि २४ मीटरच्या पुढेच बांधकामे केल्याचे पथकाच्या निदर्शनास आले.

सेव्हल हील- सुतगिरणी चौक हा रस्ता ३० मीटर रूंद असून, सुतगिरणी चौक ते शहानूरमियाँ दर्गा चौक हा रस्ता २४ मीटरचा आहे. आज गुरुवारी शहानूरमियाँ दर्गा चौक ते भाजीवाली बाई पुतळा, पुढे आनंद गाडे चौकापर्यंत मार्किंग करण्यात येणार आहे. हाही रस्ता २४ मीटर रूंदीचा आहे. त्‍याच्या अनेक अतिक्रमणे असल्याचा अंदाज आहे. बुधवारी १११ मालमत्तांच्या कागदपत्रांची तपासणी करण्यात आली. त्‍यात ४२ व्यावसायिक, निवासी तथा व्यावसायिक ६४, शासकीय २, इतर ३ मालमत्ता आहेत. ३ मालमत्ताधारकांना गुंठेवारीची नोटीस बजावण्यात आली आहे.

हर्सूलमध्ये पाडापाडी...
हर्सूलमध्ये महापालिका शाळेजवळ ४ हजार चौरस फूट जागेवर असलेली पक्‍की अतिक्रमणे बुधवारी (२३ जुलै) पाडण्यात आली. अतिक्रमणधारकांनी आधीच सामान काढून ठेवले होते. महापालिकेच्या बुलडोझरने आरसीसीचे पक्‍के, तर काही कच्‍चे बांधकाम उद्‌ध्वस्त केले. ही कारवाई अतिक्रमण नियंत्रण अधिकारी संतोष वाहुळे यांच्या मार्गदर्शनाखाली सहायक आयुक्त अशोक गिरी, संजय सुरडकर, बांधकाम निरीक्षक सय्यद जमशेद, रवींद्र देसाई, सोमशंकर मेत्रे, नागरी मित्र पथक प्रमुख प्रमोद जाधव यांनी केली. या जागेवर महापालिकेकडून व्यायामशाळा बांधण्यात येणार आहे.

कोणत्‍याही क्षणी या ७ रस्‍त्‍यांवर अवतरणार पथक
दरम्‍यान, आता पोलिसांनी बंदोबस्त दिला की महापालिकेचे अतिक्रमण हटाव पथक कोणत्‍याही क्षणी हर्सूल रस्ता, नारेगाव रस्ता, सेव्हन हिल्स ते सूतगिरणी चौक, सूतगिरणी चौक ते आनंद गाडे चौक, गजानन महाराज मंदिर ते जयभवानीनगर चौक, चंपा चौक रस्ता, जटवाडा रोड, महावीर चौक ते दिल्ली गेट या रस्‍त्‍यांवरील अतिक्रमणांवर बुलडोझर चढवणार आहे.