कांचनवाडीत रस्ता रूंदीकरणाला तीव्र विरोध, मार्किंगसाठी आलेल्या पथकाला नागरिकांनी पिटाळले!‌

By City News Desk

On 03 Aug 2025

कांचनवाडीत रस्ता रूंदीकरणाला तीव्र विरोध, मार्किंगसाठी आलेल्या पथकाला नागरिकांनी पिटाळले!‌

छत्रपती संभाजीनगर (सीएससीएन वृत्तसेवा) : महापालिकेने जुन्या आराखड्यानुसार कांचनवाडी ते नाथ व्हॅलीपर्यंतच्या रस्‍त्‍यावर मार्किंग करणे सुरू करताच प्रचंड विरोध झाला. नागरिकांनी पैठण रोडवर येत रास्‍ता रोको सुरू केला, घोषणाबाजी केली. ३६ मीटरऐवजी १८ मीटरचा रस्ता ठेवा, अशी मागणी आक्रमकपणे सुरू केली. त्‍यामुळे महापालिकेचे पथक धास्तावले आणि माघारी फिरले. शनिवारी (२ ऑगस्ट) सकाळी हा प्रकार घडला.

जुन्या विकास आराखड्यात हा रस्ता ३६ मीटर (११८ फूट) रूंद असून, नवीन विकास आराखड्यात त्याला १८ मीटर (६० फूट) करण्यात आले आहे. रस्ता रुंदीकरणात १०० हून अधिक मालमत्ता पाडाव्या लागणार आहेत. महापालिकेने जुन्या आराखड्यानुसारच रस्ता रूंद करण्यासाठी ठराव घेतला असून, शासनाने त्याला मंजुरीही दिली आहे. महापालिकेचे पथक शनिवारी सकाळीच मार्किंगसाठी आले. त्‍यांना कांचनवाडीपासूनच कडाडून विरोध सुरू झाला.

त्‍यामुळे पथक मार्किंगसाठी नाथ व्हॅलीकडे गेले. तेथेही जोरदार विरोध झाला. तणावाचे वातावरण पाहून पोलीस बंदोबस्त मागविण्यात आला, मात्र पोलीस आलेच नाही. त्‍यामुळे पथकाला परत फिरावे लागले. नवीन विकास आराखड्यानुसारच रस्ता रूंदीकरण करावे, बाधित मालमत्ताधारकांना आधी मोबदला द्यावा, अशी मागणी नागरिकांनी केली. या रस्त्यावरील ३ मालमत्ता वाचविण्यासाठी महापालिकेचे अधिकारी रस्त्याची अलाइनमेंट बदलत असल्याचा आरोपही नागरिकांनी केला.