कुख्यात गुन्हेगार तेजाचा मैत्रिणीवर गोळीबार, गंभीर जखमी, किलेअर्क परिसरातील थरार

छत्रपती संभाजीनगर (सीएससीएन वृत्तसेवा) : कुख्यात गुन्हेगार सय्यद फैजल ऊर्फ तेजा सय्यद एजाज (रा. किलेअर्क) याने किलेअर्क परिसरात पिस्तुलाद्वारे मैत्रिण राखी मुरमुरे (वय २४) हिच्यावर गोळी झाडली. यात ती गंभीर जखमी झाली असून, तिच्यावर घाटी रुग्णालयात उपचार सुरू आहेत. सोमवारी (११ ऑगस्ट) रात्री ११ वाजता ही थरारक घटना घडली.

सय्यद फैजल ऊर्फ तेजा नुकताच जामिनावर सुटलेला आहे. तेजाने ९ ऑगस्ट रोजी मैत्रिण राखीला आपल्या घरी राहायला आणले होते. सोमवारी रात्री त्‍यांच्यात वाद झाला. रागाच्या भरात तेजाने तिच्यावर गोळी झाडली. गोळीबाराचा आवाज ऐकताच शेजारील नागरिकांनी तेजाच्या घराकडे धाव घेत तिला घाटी रुग्णालयात आणले. शहर गुन्हे शाखेचे वरिष्ठ पोलीस निरीक्षक संभाजी पवार, बेगमपुरा पोलीस ठाण्याचे पोलीस निरीक्षक मंगेश जगताप, गुन्हे शाखेचे उपनिरीक्षक संदीप शिंदे, विशाल बोडखे यांनी घटनास्थळी धाव घेतली.

तेजाविरुद्ध बलात्कार, शस्त्रसाठा, ड्रग्ज तस्करी असे १५ हून अधिक गंभीर गुन्हे दाखल असून, तो कारागृहातून बाहेर पडला तेव्हा त्‍याच्या साथीदारांनी त्याच्या स्वागताचे रील बनवून स्टेटसला ठेवले होते. रात्री उशिरा तेजाच्या शोधासाठी पोलीस पथके रवाना करण्यात आली. गेल्या काही दिवसांपासून मोठ्या प्रमाणावर गुन्हेगार जेलमधून जामिनावर सुटत असून, शहराची सुरक्षितता धोक्‍यात आल्याचे दिसून येत आहे. जामिनावर सुटलेल्या गुन्हेगारांची संख्या २२१ इतकी असून, सर्वाधिक १८७ गुन्हेगार गेल्या जुलैमध्ये जेलमधून बाहेर आले आहेत. पोलिसांचे दुर्लक्ष व गांभीर्याने न घेण्यामुळे कुख्यात गुन्हेगारांच्या कारवाया वाढीस लागल्या आहेत. लुटमार, चाकूहल्ले, मारामाऱ्या राजरोस घडत आहेत.

काही महिन्यांपूर्वी राखीला पोलिसांनी केली होती अटक
२४ वर्षीय राखी मूळची नांदेडची असून, काही महिन्यांपूर्वी पिस्तुलातून गोळीबार करतानाचा तिचा व्हिडीओ व्हायरल झाला होता, तेव्हा सिटी चौक पोलिसांनी तिला अटक केली होती. तिच्या खोलीतून एक गावठी कट्टा, जिवंत काडतुसे व तीन चाकू जप्त केले होते. ती तेजासह पुंडलिकनगरमधील एका कुख्यात गुन्हेगाराची मैत्रीण आहे. राखीला गुन्हे जगताचे आकर्षण असून यातून तिला लेडी डॉन व्हायचे स्वप्न पडत असते. पिस्तूल पुरवणाऱ्याचे नाव किशोर ज्ञानेश्वर जाधव (वय २७, रा. आष्टी जायकवाडी कॅम्‍प, जि. जालना) असे आहे. तो अंबडमध्ये कुख्यात गुन्हेगार म्‍हणून कुपरिचित आहे. त्‍याचे वडील पोलीस अधिकारी आहेत. राखीचे वडील पोलीस आहेत. नांदेड शहरातील रहिवासी राखी सुशिक्षित कुटुंबातील असून शिक्षणासाठी काही वर्षांपूर्वी छत्रपती संभाजीनगर शहरात आली होती. मात्र, चुकीच्या संगतीमुळे गुन्हेगारांच्या संपर्कात आली. राखीविरुद्ध विविध पोलीस ठाण्यांत गुन्हे दाखल आहेत.