ती कॉम्‍प्‍युटर इंजिनिअर नव्हतीच!; ३७ वर्षीय तरुणासोबत काय घडलं, पुंडलिकनगर पोलिसांनी केलाय गुन्हा दाखल

By City News Desk

On 12 Sep 2025

ती कॉम्‍प्‍युटर इंजिनिअर नव्हतीच!; ३७ वर्षीय तरुणासोबत काय घडलं, पुंडलिकनगर पोलिसांनी केलाय गुन्हा दाखल

छत्रपती संभाजीनगर (सीएससीएन वृत्तसेवा) : कॉम्‍प्‍युटर इंजिनिअर असल्याचे सांगून लग्‍न करणारी तरुणी कॉम्‍प्‍युटर इंजिनिअर नाही, हे लग्‍नानंतर समोर आले. तिला आजार असल्याचेही समोर आले. त्‍यानंतर हद्द ही झाली, की पैसे उकळण्यासाठी खोट्या तक्रारी करण्यासही ही तरुणी सरसावली. मात्र पोलिसांनी तिचा डाव उधळून लावला. या तरुणीसह तिचे कुटुंब व लग्न जमवण्यासाठी मध्यस्थी करणाऱ्यांविरुद्धही गुन्हा दाखल करण्यात आला आहे.

पुंडलिकनगर परिसरात राहणाऱ्या ३७ वर्षीय तरुणाने याप्रकरणात तक्रार दिली आहे. तो बेरोजगार आहे. त्‍याचा पहिल्या पत्नीशी घटस्फोट झाला असून, त्याच्या वडिलांचे मित्र असलेल्या सत्तार सरदार खान पठाण व शिवाजी रावसाहेब दांडगे यांनी अर्चना दांडगे हिचे स्थळ या तरुणासाठी सुचवले होते. अर्चना कॉम्‍प्‍युटर इंजिनिअर असल्याचे सांगितले होते. त्यानंतर अर्चनासोबत तरुणाने ४ मे २०२३ रोजी लग्‍न केले.

लग्नानंतर मात्र अर्चनाचे बिंग फुटले. त्‍यामुळे तरुणाने जाब विचारला असता तरुणीने चक्क पैसे उकळण्यासाठी खोट्या तक्रारी करण्याचा कट रचला. तरुणाने पुंडलिकनगर पोलिसांत धाव घेऊन तक्रार दिली. त्‍यावरून सत्तार सरदार खान पठाण, शिवाजी दांडगे, भाऊराव दादा दांडगे, कमल भाऊराव दांडगे, वैशाली मयूर दसपुते ऊर्फ वैशाली भाऊराव दांडगे, गणेश भाऊराव दांडगे व अर्चना यांच्याविरुद्ध गुन्हा दाखल करण्यात आला आहे. अधिक तपास पोलीस करत आहेत.