पत्नीच्या कमाईशी पती करू लागला बरोबरी; पोलिसांनी केली अटक, कारण...

छत्रपती संभाजीनगर (सीएससीएन वृत्तसेवा) : रुग्णालयात नोकरीला असलेल्या पत्नीची कमाई चांगली. पण पतीची टेलरिंग व्यवसायातून फारशी कमाई होत नव्हती. पत्नीच्या कमाईशी बरोबरी करण्यासाठी त्याने चक्क दुचाकी चोरीचा नवा धंदा सुरू केला. बार, घाटी रुग्णालयासमोरून त्याने ७ दुचाकी चोरल्या. पोलिसांनी या दुचाकीचोराला अटक केली आहे.

अताऊर रहेमान निसार अहमद अन्सारी (वय ४०, रा. सिटी चौक) असे या संशयिताचे नाव असून, शहर गुन्हे शाखेने घाटीच्या पार्किंगमधील एका दुचाकी चोरीच्या गुन्ह्यात अन्सारीला अटक केल्यानंतर यापूर्वी त्‍याने केलेले दुचाकी चोरीचे गुन्हेही समोर आले. घाटीतून दुचाकी चोरताना तो सीसीटीव्ही कॅमेऱ्यात कैद झाला होता. शहर गुन्हे शाखेचे पोलीस निरीक्षक संभाजी पवार, पोलीस उपनिरीक्षक विशाल बोडखे यांनी त्याचा शोध घेतला. शोध घेत पोलीस त्याच्या घरापर्यंत आले. मात्र तो मालेगावला गेला होता.

पोलीस उपनिरीक्षक विशाल बोडखे, पोलीस अंमलदार योगेश गुप्ता, संतोष भानुसे, विजय घुगे, विक्रम खंडागळे, जालिंदर गोरे, सोमनाथ दुकले यांनी मालेगावमध्ये जाऊन त्याला अटक केली. अन्सारी मालेगावचा असून, ४ वर्षांपूर्वी त्‍याने छत्रपती संभाजीनगर शहरातील मुलीसोबत निकाह केला. पत्नीच्या हट्टामुळे तो छत्रपती संभाजीनगर शहरात राहायला आला. त्याची पत्नी रुग्णालयात नोकरीला आहे. पण अन्सारीचे टेलरिंगमधील उत्पन्न फारसे नव्हते. पत्नीशी बरोबरी करताना गुन्हेगारी मित्रांच्या संगतीमुळे त्याने दुचाकी चोरी करण्याचा निर्णय घेतला. ८ महिन्यांपूर्वी एका बार समोरून दुचाकी चोरल्यानंतर त्याने दुचाकी चोरण्याचा सपाटाच लावला. घाटी व महापालिका परिसरातील बारसमोरून त्याने ७ दुचाकी चोरून मालेगावला नेऊन विकल्या. बनावट चावीने तो दुचाकी चोरायचा.