पिसादेवीत किराणा दुकान फोडून दीड लाखाचे साहित्य लंपास

छत्रपती संभाजीनगर (सीएससीएन वृत्तसेवा) : पिसादेवी परिसरात किराणा दुकान फोडून चोरट्यांनी १ लाख ४७ हजार ७९० रुपयांचा मुद्देमाल लंपास केला. ही घटना बुधवारी (३ सप्‍टेंबर) सकाळी साडेसातला समोर आली. चिकलठाणा पोलिसांनी चोरट्याविरुद्ध गुन्हा दाखल केला आहे.

अनिल ताराचंद चव्हाण (वय ३६, रा. अंजनडोह, ता. छत्रपती संभाजीनगर) यांनी या प्रकरणात तक्रार दिली आहे. त्यांचे श्रीकृष्णा रेसिडेसी, पिसादेवी बायपास रोडवर शारवी ॲण्ड तुळजाभवानी किराणा मालाचे दुकान आहे. मंगळवारी (२ सप्टेंबर) नेहमीप्रमाणे रात्री ९ ला ते दुकान बंद करून अंजनडोहला गेले. बुधवारी (३ सप्टेंबर) सकाळी साडेसातला दुकान उघडल्यानंतर दुकानात चोरी झाल्याचे त्यांच्या लक्षात आले. त्यांनी चुलत भाऊ दादाराव शंकर चव्हाण यांना बोलावून घेतले. दुकानामागील बाजूच्या पत्र्याचे स्क्रू काढून पत्रा उचटकलेला दिसला.

नंतर चिकलठाणा पोलिसांना कळविण्यात आले. काही वेळाने पोलिसांनी दुकानाला भेट देऊन पाहणी केली. दुकानातून १५ लिटर तेलाचे ७ डबे, ११  तेलाचे बॉक्स (त्यात १ लिटरची १२ पाकिटे होती), ५ लिटर तेलाचे ४ बॉक्स (एका बॉक्समध्ये ४ कॅन), ७ हजारांचे ड्रायफ्रूट, २५ हजारांची चहापत्ती, ३० हजारांची मसाल्याची पाकिटे, ७ हजारांचे सीसीटीव्ही कॅमेरे, ४२ हजार रुपये रोख असा एकूण एक लाख ४७ हजार ७९० रुपयांचा मुद्देमाल चोरट्याने लंपास केल्याची तक्रार चव्हाण यांनी केली. त्यावरून पोलिसांनी चोरट्याविरुद्ध गुन्हा दाखल केला आहे. अधिक तपास पोलीस अंमलदार अनिल पवार करत आहेत.