रामनगरमध्ये खून!; २७ वर्षीय तरुणाला २ नशेखोरांनी चाकूने भोसकले, ऐन दिवाळीत छत्रपती संभाजीनगर हादरले!!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : ऐन दिवाळीत लक्ष्मीपूजनाच्या दिवशी छत्रपती संभाजीनगर आणखी एका हत्येच्या घटनेने हादरले. शहरातील रामनगरमध्ये जालना रोडच्या सर्व्हिस रोडवर मंगळवारी (२१ ऑक्‍टोबर) पहाटे दोनच्या सुमारास (मध्यरात्री) दोन गावगुंडांनी २७ वर्षीय तरुणाची चाकूने भोसकून निर्घृण हत्या केली. विपुल मधुकर चाबूकस्वार (रा. तोरणगडनगर, सिडको) असे हत्या झालेल्या तरुणाचे नाव असून, मुकुंदवाडी पोलिसांनी मारेकरी आशिष गौतम चौथमल (रा. मुकुंदवाडी) व त्याचा साथीदार सुबोध भास्कर देहाडे (रा. मुकुंदवाडी) यांना अटक केली आहे.

मध्यमवर्गीय कुटुंबातील विपुल हा मित्र अजय वाघसोबत सोमवारी दिवसभर फटाक्यांच्या दुकानात होता. रात्री साडेदहाच्या सुमारास दुकान बंद केल्यावर दोघे परिसरातच गप्पा मारत फिरले. मंगळवारी पहाटे अडीचच्या सुमारास विठ्ठलनगर चौकातून रामनगरच्या सर्व्हिस रोडने मोपेडवरून जात असताना त्यांना गॅस पंपाजवळ त्यांचा मित्र कुणाल रिक्षात बसलेला दिसला. विपुल आणि अजय तेथे थांबले. कुणालसोबत वैभव चव्हाणही होता. चौघे गप्पा मारत असताना अचानक तिथे मारेकरी सुबोध व आशिष आले. जुन्या वादातून त्यांनी आधी विपुलशी वाद केला. त्यानंतर आशिषने चाकू काढून तेथे विपुलच्या छातीत डाव्या बाजूने खुपसला.

काही सेकंदात तसाच उभा विपुल धाडकन जमिनीवर कोसळला. चाकूचा वार खोलवर झाल्याने विपुल कोसळताच रक्‍तबंबाळ झाला. त्यानंतर मात्र मारेकरी आशिषचा साथीदार सुबोध हादरून गेला. त्याने त्याच्याच दुचाकीवर टाकून विपुलला खासगी रुग्णालयात आणले. मात्र, डॉक्‍टरांनी तपासून मृत घोषित केले. त्यानंतर सुबोध आणि आशिष दोघेही पसार झाले. या घटनेची माहिती मुकुंदवाडी पोलिसांना कळवताच त्यांनी तातडीने तपासाची चक्रे फिरवत मंगळवारी सकाळी दोन्ही मारेकऱ्यांना अटक केली. त्यांना जिल्हा सत्र न्यायालयात हजर केले असता २५ ऑक्टोबरपर्यंत पोलीस कोठडी सुनावण्यात आली.

मुकुंदवाडीत नशेखोर, गावगुंडांच्या टोळ्या...
मुकुंदवाडी, रामनगरात सध्या गावगुंडांच्या टोळ्या मोठ्या प्रमाणावर तयार झाल्या आहेत. त्यामुळे गुन्हे वाढले आहेत. एकट्यादुकट्याला लुटणे, मारहाण करणे, महिला-मुलींची छेड काढणे असे प्रकार सातत्याने घडत आहेत. पोलीस या सर्व प्रकाराला गांभीर्याने घेत नसल्याचा वारंवार आरोपही होतो. गावगुंड शस्‍त्रे घेऊनच फिरत असतात. ते सोशल मीडियावर शस्त्रांसह फोटो टाकून दहशत निर्माण करतात. नागरिकांनी वेळोवेळी तक्रारी करूनही पोलीस दुर्लक्ष करत असल्याने मुकुंदवाडी पोलीस ठाण्याच्या हद्दीत अक्षरशः गुंडाराज सुरू असून, नागरिक भयग्रस्त होऊन जगत आहेत.