छत्रपती संभाजीनगर (मेट्रोपोलिस पोस्ट वृत्तसेवा) : मुकुंदवाडी पोलीस ठाण्याचे अंमलदार नितेश जाधव यांच्यासह चौघांविरुद्ध हॉटेलमध्ये केलेल्या राड्याप्रकरणी करमाड पोलिसांनी मंगळवारी (३ मार्च) गुन्हा दाखल केला आहे. जाधव यांनी हॉटेलमालक आणि त्यांच्या नातेवाइकांना मारहाण करत तिघांवर चाकूने वार करून जखमी केल्याचा आरोप हॉटेलमालकांनी केला आहे. ही घटना पांढरी पिंपळगाव शिवारातील हॉटेल कार्तिक बार ॲन्ड हॉटेल, लॉजिंग येथे घडली.
वसुदेव लक्ष्मण सूर्यवंशी (वय ३६, रा. पिंपळगाव पांढरी, ता. छत्रपती संभाजीनगर) यांनी या प्रकरणात तक्रार दिली आहे. तक्रारीत म्हटले आहे, की त्यांचे पांढरी पिंपळगाव शिवारात हॉटेल कार्तिक बार, हॉटेल, लॉजिंग आहे. हॉटेल ते व त्यांचे भाऊ मिळवून चालवतात. धुलिवंदन असल्याने मंगळवारी (३ मार्च) दुपारनंतर त्यांनी हॉटेल उघडले. त्यांचे काका सतीश सूर्यवंशी हे काऊंटरवर बसलेले होते. वसुदेव हे बाजूलाच खुर्चीवर बसलेले होते. एक व्यक्ती काऊंटरवर आला. त्याने दारूचा खंबा मागितला. दारू दिल्यानंतर त्याने पैसे विचारले. त्यावर सतीश सूर्यवंशी यांनी १३९० रुपये सांगितले. तेव्हा तो व्यक्ती म्हणाला, १३०० रुपयांना द्या. त्यावर सतीश सूर्यवंशी यांनी त्याला आम्हाला परवडत नाही, असे म्हटले.
त्यावर तो व्यक्ती म्हणाला, की मी पोलीसवाला आहे. माझे ओळखपत्र दाखवू का, माझे नाव नितेश जाधव आहे. त्यावर वसुदेव सूर्यवंशी यांनी मध्यस्थी केली असता जाधव यांनी शिवीगाळ करून मारण्याच्या धमक्या दिल्याचे तक्रारीत म्हटले आहे. तक्रारीत पुढे म्हटले आहे, की वसुदेव आणि जाधव यांच्यात बाचाबाची झाली. तेथे वसुदेव यांचे भाऊ शुभम व नाना आले. त्यावेळी जाधव यांनी शुभम यांच्या पोटात जोरात लाथ मारली. त्याच्यासोबतच्या ३ जणांनीदेखील वसुदेव आणि त्यांच्या भावांना शिवीगाळ केली. जाधव यांनी वसुदेव यांची मान पकडून ओढत हॉटेलच्या गेटवर नेले. त्यानंतर जाधव यांनी खिशातून चाकू काढल्याने वसुदेव वाकले. त्या चाकूने नाना यांच्या हातावर वार करून जाधव यांनी जखमी केले.
ओढत हॉटेलच्या अंगणातील दगडी कचवरून नेल्याने वसुदेव यांचे दोन्ही गुडघे खरचटून, फुटून रक्त निघाले. वसुदेव यांचे दाजी संभाजी शिवाजी कल्होरे (रा. पांढरी पिंपळगाव) यांनी त्यांच्यात मध्यस्थी करून सोडवासोडव करण्याचा प्रयत्न केला असता नितेश जाधव यांनी संभाजी यांच्या पोटात चाकू मारून जखमी केले. नंतर शुभम यांच्या गळ्यावरही चाकूने वार केला. जखमी संभाजी कल्होरे यांना खासगी वाहनातून अमोल जाधव व सुजीत साबळे यांनी छत्रपती संभाजीनगरच्या रुग्णालयात हलवले. त्यानंतर वसुदेव व त्यांच्या नातेवाइकांनी नितेश जाधव यांना पकडून करमाड पोलीस ठाण्यात आणल्याचे तक्रारीत म्हटले आहे. अधिक तपास सहायक पोलीस उपनिरीक्षक दगडू तडवी करत आहेत.
