लग्नात व्हीआयपी पाहुणे आणण्यासाठी कल्पना उकळत होती पैसे!; स्वयंघोषित सामाजिक कार्यकर्ता रमेशची सन्मानपत्रे खरी की खोटी, पोलिसांकडून तपास सुरू 

छत्रपती संभाजीनगर (मेट्रोपोलिस पोस्ट वृत्तसेवा) : लग्नात व्हीआयपी पाहुणे आणण्यासाठीही कल्पना पैसे उकळायची. तसा १ लाख रुपयांचा व्यवहार समोर आला आहे. घोटाळ्यात कल्पनाचा प्रियकर अशरफनेही अनेक व्यवहार सांभाळले आहेत. देशाच्या सर्वोच्‍च पुरस्कारासाठी शिफारसपत्रे व सन्मानपत्रे जमा करणाऱ्या स्वयंघोषित सामाजिक कार्यकर्ता रमेशचीही चौकशी होणार असून, त्याची ही कागदपत्रे खरी की खोटी याचाही तपास होणार आहे.

सरकारी नोकरीला लावून देण्याचे, लग्नात व्हीआयपी पाहुणे आणण्याचे आणि देशातील सर्वोच्‍च पुरस्कार मिळवून देण्याचे आमिष दाखवणाऱ्या कल्पना आणि तिच्या साथीदारांनी अनेकांना लाखो रुपयांनी गंडा घातला असून, त्यांना या प्रकरणात साक्षीदार करण्यात आले आहे. या प्रकरणात कल्पना त्र्यंबकराव भागवत (वय ४५, रा. चिनारगार्डन, पडेगाव, छत्रपती संभाजीनगर), तिचा अफगाणी प्रियकर मोहम्मद अशरफ गिल (वय २४, ह. मु. जंगपुरा, नवी दिल्ली), साथीदार दत्तात्रय पांडुरंग शेटे (वय ३८, रा. मांडवगण, ता. श्रीगोंदा, जि. अहिल्यानगर ) व डिम्पी देवेंद्रकुमार हरजाई (वय ३०, रा. पालम, दिल्ली) यांना पोलिसांनी आतापर्यंत अटक केलेली आहे. कल्पना न्यायालयीन कोठडीत असून, दत्तात्रय, अशरफ आणि डिम्पी यांच्या पोलीस कोठडीची मुदत संपल्याने मंगळवारी (९ डिसेंबर) न्यायालयात हजर केले असता न्यायालयाने त्यांना आणखी ३ दिवसांची पोलीस कोठडी (१२ डिसेंबरपर्यंत) सुनावली.

-शिर्डी येथील मनोज लोढा यांचा जबाब पोलिसांनी नोंदवला. त्यांनी पोलिसांना सांगितले, की दिल्लीतील एकाने आयएएस कल्पना भागवत या शिर्डी येथे दर्शनासाठी येणार असल्याने त्यांची सोय करण्यास सांगितले होते. शिर्डीत त्यांची तिच्याशी भेट झाली. तिने स्वतःला आयएएस २०१७ साली झाल्याचे सांगितले होते. २०२१ साली दत्तात्रय शेटेसोबत लोढा यांची जमीन खरेदीसंदर्भात ओळख झाली होती. त्याने दिल्लीपर्यंत कनेक्शन असल्याचे सांगितले होते.
-उदयपूर (राजस्थान) येथील डॉ. निखिल भाकरे यांची मुख्यमंत्री आयुष्मान योजनेदरम्यान कल्पना भागवतसोबत ओळख झाली होती. कल्पना आणि डिम्पी हरजाईने त्यांना नॅशनल मेडिकल कमिशनमध्ये नोकरी लावून देण्याचे आमिष दाखवून ५० हजार रुपयांचा गंडा घातला. यापूर्वी हॉस्पिटलच्या कार्यक्रमासाठी तिने डॉ. भाकरे यांच्याकडून विमानाचे तिकीट काढून घेतले होते.
-पुणे येथील सुधाकर जाधवर यांच्या मुलीच्या लग्नात व्हीव्हीआयपी पाहुण्यांना आणण्याचे आश्वासन देऊन या टोळीने जाधवर यांच्याकडून १ लाख रुपये उकळले होते.
-दत्तात्रय शेटे याने कल्पनासाठी बनावट आयएएस निवड यादी तयार केली होती. तो मूळ राहाता तालुक्यातील रहिवासी असून तो श्रीगोंदा परिसरात राहत होता. वैद्यकीय कारणासाठी तो पत्नीसह तिथे राहत होता. शेटेच्या वडिलांनी त्याचा मोबाइल पोलिसांना आणून दिला असून, त्यातील डेटा उडविण्यात आला आहे.
-पोलीस उपनिरीक्षक निवृत्ती गायके यांच्या पथकाने डिम्पीला दिल्लीत नेऊन त्याच्या घराची झडती घेतली. त्याच्या घरातून पोलिसांनी पासपोर्ट जप्त केला आहे. डिम्पीला न्यायालयात हजर केले तेव्हा त्याचे आई-वडील, भाऊ आले होते.
कल्पना भागवत ६ महिन्यांपासून जालना रोडवरील ॲम्बेसेडर या फाइव्ह स्टार हॉटेलमध्ये मुक्कामी थांबली होती. सिडको पोलिसांनी तिला हॉटेलमधून २२ नोव्‍हेंबरला अटक केली होती. गुन्ह्याचा तपास पोलीस निरीक्षक अतुल येरमे हे करत आहेत.