म्हणाला, मी मुकुंदवाडीचा दादा... ‘मकोका’ लागूनही बाहेर आलोय... कुख्यात गुंड मुकेश साळवेचे तरुणावर चाकूचे सपासप वार

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : १७ गंभीर गुन्ह्यांत आरोपी असलेल्या कुख्यात गुंड मुकेश महेंद्र साळवे (वय २७) याने २८ वर्षीय बाळू मकळे (रा. मुकुंदनगर) या तरुणावर दीड फूट लांब चाकूने प्राणघातक हल्ला चढवला. ही घटना मंगळवारी (२ सप्‍टेंबर) सकाळी साडेनऊला मुकुंदनगरात घडली. हल्ल्यात बाळू गंभीर जखमी झाला आहे. मी आताच मकोका लागल्यानंतर बाहेर आलोय. मी मुकुंदवाडीचा दादा... माझे कोणीच काही वाकडे करू शकत नाही, असे मुकेशने त्याला धमकावले. मुकुंदवाडी पोलिसांनी मुकेशला अटक केली असून, बुधवारी (३ सप्‍टेंबर) न्यायालयाने त्याला २ दिवसांची पोलीस कोठडी सुनावली.

मुकेशने काही दिवसांपूर्वी एका इलेक्ट्रिशियनवर प्राणघातक हल्ला केला होता. त्याला ८ टाके पडले. मात्र, पोलिसांत तक्रार करू नये म्हणून मुकेशने त्याला रुग्णालयात जाऊन धमकावले होते. त्‍यामुळे त्याने पोलिसांत तक्रार केली नाही. बाळू घरासमोर असताना मुकेशने तिथे येत अचानक बाळूला लाथाबुक्क्यांनी मारहाण सुरू केली. शिवीगाळ करत, धमक्या देत तू मला का भिडतो, असे म्हणत काही कळण्याच्या आतच त्याने कंबरेला लावलेला अंदाजे दीड ते दोन फूट लांब धारदार चाकू काढून बाळूवर वार केले.

बाळूच्या तक्रारीवरून गुन्हा दाखल करून पोलीस उपनिरीक्षक सचिन वायाळ यांनी मुकेशला लगेचच अटक केली. मार्चमध्ये मुकेश साळवेसह विकी ऊर्फ हेल्मेट सोनकांबळे (वय ३३), बालाजी पिवळ (वय ३२) या टोळक्‍याने अन्य साथीदारांच्या मदतीने एका व्यापाऱ्याला खंडणी मागून प्राणघातक हल्ला केला होता. गोळीबारही केला होता. त्यांच्यावर मकोका अंतर्गत कारवाई झाली होती. ऑगस्टमध्ये विकी वगळता सर्व आरोपी जामिनावर सुटले आहेत. बाहेर येताच मुकेशने पुन्हा गुन्हेगारी थरार घडवायला सुरुवात केली. आता त्याला पोलिसांनी पुन्हा अटक केली आहे.

सोशल मीडियातून पसरवतात दहशत
मुकेश साळवे आणि त्‍याची गँग ही सोशल मीडियावर वेगवेगळ्या शस्‍त्रांसह छायाचित्रे, व्हिडीओ बनवून टाकतात. त्‍याद्वारे ते दहशत पसविण्याचा प्रयत्‍न करतात. मात्र शहराच्या सायबर पोलीस टीमचे याकडे लक्ष कसे जात नाही, असा प्रश्न नागरिकांना पडला आहे.