सिडको बसस्थानकावर ३ महिलांचा धुमाकूळ, नागरिकांनी दोघींना पकडून दिले पोलिसांच्या ताब्यात, १ पळाली...

छत्रपती संभाजीनगर (मेट्रोपोलिस पोस्ट वृत्तसेवा) : सिडको बसस्थानकावर चोरट्या महिलांची टोळी सक्रीय असल्याचे सोमवारी (८ डिसेंबर) सकाळी ११ ला समोर आले. तिघींपैकी दोघी नागरिकांनी पकडल्या आणि पोलिसांच्या ताब्यात दिले. त्यांची एक साथीदार पळून गेली. या महिलांनी दोन विवाहितांचे मनीमंगळसूत्र चोरल्याचे समोर आले. तिन्ही चोरट्या महिलांविरुद्ध सिडको एमआयडीसी पोलिसांनी गुन्हा दाखल केला आहे.

अर्चना देवानंद खंदारे (वय ४०, रा. मुकुंदवाडी) यांनी या प्रकरणात तक्रार दिली आहे. त्यांचे पती सुरक्षारक्षक आहेत. सोमवारी सकाळी ११ ला खंदारे कुटुंबाला वेरूळला जायचे होते. ते सर्व सिडको बसस्थानकावर आले. सिडको बसस्थानकातून सिटी बसने बाबा पेट्रोलपंपाकडे जायचे असल्याने सिटी बसमध्ये चढत असताना कोणीतरी अनोळखी महिलेने त्यांच्या गळ्यातील लांब मनीमंगळसूत्र असलेली सोन्याची पोत ६ ग्रॅम वजनाची ओढून तोडल्याची जाणीव अर्चना यांना झाली. त्यांनी लगेचच गळ्याला हात लावला असता लक्षात आले, की गळ्यातील सोन्याची पोत त्यातील काही सोन्याचे मनी व मंगळसूत्र त्या अनोळखी महिलेने चोरले आणि पळू लागली.

अर्चना यांनी आरडाओरड केल्याने त्यांचे पती देवानंद चोखाजी खंदारे व इतर लोकांनी पाठलाग करून दोन महिलांना पकडले व एक महिला पळून गेली. आणखी एक महिला अश्विनी आकाश पोटे (वय २२, रा. गुरुदत्तनगर गजानन मंदिराजवळ छत्रपती संभाजीनगर) यासुद्धा कुटुंबासह अक्कलकोट येथे जाण्यासाठी सिडको बसस्थानकावर आल्या असता बसमध्ये चढत असताना त्यांच्या गळ्यातील लांब मनीमंगळसूत्र आसलेली पोत कापून त्यातील मनी मंगळसूत्र व काही मनी असे चार ग्रॅम वजनाची पोत या महिलांपैकी कोणीतरी कापून चोरून घेऊन गेली.

लोकांनी पकडलेल्या महिलांची नावे चांदणी लक्ष्मण पवार (रा. मिटमिटा, पडेगाव, छत्रपती संभाजीनगर) व पिंकी सुशिल मिश्रा असे असल्याचे त्यांनी सांगितले. एक महिला तेथून पळून गेली. ३६ हजार रुपयांचे ६ ग्रॅमचे मनीमंगळसूत्र आणि ४० हजार रुपयांचे ४ ग्रॅमचे मनीमंगळसूत्र असलेली अर्धवट तुटलेली पोत असा एकूण ७६ हजार रुपयांचा मुद्देमाल महिलांना चोरून नेला. अधिक तपास पोलीस अंमलदार सुभाष पवार करत आहेत.
(छत्रपती संभाजीनगर सिटी न्यूजला बातमी पाठवायची? : cscndesk@gmail.com वर पाठवा.)