छत्रपती संभाजीनगर (सीएससीएन वृत्तसेवा) : छत्रपती संभाजीनगर शहर पोलिसांच्या एका मोठ्या निर्णयाचे पालक वर्गातून स्वागत होत आहे. रोडरोमिओंविरुद्ध पोलिसांनी मोठी मोहीम हाती घेतली आहे. शाळा, कॉलेजसमोर पोलीस साध्या वेशात थांबणार आहेत, एका मुलीची छेड काढताना, धिंगाणा घालताना, टवाळखोरी करताना कुणी दिसला की त्‍याला पकडून बेदम चोपणार आहेत. यासाठी शहराचे पोलीस आयुक्त प्रवीण पवार यांनी ५ अधिकारी व ३० अंमलदारांचे विशेष पथक नेमले आहे. सोमवारपासून (२८ जुलै) त्‍यांनी कामगिरीला सुरुवातही केली असून, पहिल्याच दिवशी रोडरोमिओंच्या पाठीवर लाठीचे वळही उमटवले आहेत. त्‍यामुळे स. भु. परिसरात धावपळ सुरू झाली होती.
शाळा, कॉलेजांसोबत मोकळी मैदाने, कट्ट्यावर बसून दारू, सिगारेट पिणाऱ्यांवरही कठोर कारवाईचे आदेश पोलीस आयुक्‍तांनी दिले आहेत. शाळा, कॉलेज सुरू होताच रोडरोमिओ, टवाळखोर मोठ्या प्रमाणावर शाळा, कॉलेजच्या गेटसमोर, परिसरात जमत आहेत. येणाऱ्या जाणाऱ्या विद्यार्थिनींची छेड काढण्याचे प्रकार घडत आहेत. रोडरोमिओ विद्यार्थिनींचा पाठलाग करत असल्याचेही प्रकार घडत आहेत. अश्लील शेरेबाजी करतात. त्‍यामुळे पालक आणि विद्यार्थिनी धास्तावल्या आहेत. त्‍यांची भीती दूर करण्यासाठी पोलीस काका आता लाठी घेऊन रस्‍त्‍यावर उतरले आहेत.
पोलीस आयुक्त प्रवीण पवार यांनी सहायक पोलीस निरीक्षक शिवाजी चौरे, पोलीस उपनिरीक्षक संदीप काळे, अर्जुन कदम, अभिजित चिखलीकर यांच्या पथकाला कारवाईचे आदेश दिल्यानंतर पोलिसांनी सरस्वती भुवन शिक्षण संस्थेचा परिसर गाठला. शुक्रवार व शनिवारी या पथकाने रोडरोमिओंना पाठलाग करून, पकडून लाठीचा यथेच्छ प्रसाद दिला. त्‍यानंतर सोमवारी दुपारी एकला पोलिसांचे पथक स. भु. परिसरात धडकले. पोलिसांना पाहून रोडरोमिओ पसार झाले. रस्त्यावरच धिंगाणा, गाणे गाणाऱ्यांनाही पोलिसांनी लाठीचा प्रसाद दिलाच.
कशामुळे पोलीस ॲक्‍शवर उतरले...स. भु महाविद्यालयाबाहेर काही दिवसांपासून रोडरोमिओ आणि टवाळखोरांच्या उचापती वाढल्या आहेत. प्राचार्यांनी पोलीस आयुक्‍तांची भेट घेऊन विद्यार्थिनींच्या सुरक्षेचे साकडे घातले. याशिवाय रामनगर, संजयनगर, विठ्ठलनगरमधील नागरिकांनीही तक्रार केली होती. त्‍यामुळे पोलीस आयुक्‍तांनी या गंभीर विषयात लक्ष घालत पोलिसांना कारवाईचा फ्री हँड दिला आहे. त्‍यामुळे शहर आणि परिसरातील प्रत्‍येक शाळा, कॉलेजसमोर रोडरोमिओ, टवाळखोर दिसला की पोलीस त्‍यांना चोपणार आहेत.
मोकळी मैदानेही टार्गेटवर...
बीड बायपास, शहानूरमियाँ दर्गा चौक, टीव्ही सेंटर परिसरातील मोकळी मैदानेही पोलिसांकडून रात्री तपासली जात आहेत. दारू व अन्य नशा करणाऱ्यांवर कारवाई केली जात असून, शहानूरमियाँ दर्गा परिसरात सिग्मा रुग्णालयामागील मैदानावर काही दिवसांपूर्वी पोलिसांनी नशेखोरांची चांगलीच धुलाई केली.
मुलींनो पोलीस काकांकडे तक्रार करा..
कुणी छेड काढत असेल, त्रास देत असेल तर मुलींनी बिनधास्त पोलीस काकांकडे तक्रार करण्याची गरज आहे. तसे आवाहनच पोलीस आयुक्त प्रवीण पवार यांनी केले असून, ९२२६५१४००१ या क्रमांकावर व्हॉटस्‌ ॲप मेसेज करावा. त्यावर त्वरित कारवाई करण्यात येईल. कोणीही टवाळखोरांचा त्रास सहन करू नये. माहिती देणाऱ्याचे नाव गुप्त ठेवण्यात येईल, असे पोलीस आयुक्त प्रवीण पवार यांनी म्‍हटले आहे.
