छत्रपती संभाजीनगर (मेट्रोपोलिस पोस्ट वृत्तसेवा) : गेल्या काही दिवसांत सातत्याने पोलिसांवर हल्ले होत आहेत. पोलिसांना शिवीगाळ करून धमकावण्याचे प्रकार घडत आहेत. कठोर कारवाई होत नसल्याने अशा लोकांची हिंमत वाढतच चालली आहे. आता जे घडलं, ते अवघ्या शहर पोलीस दलासाठी चिंतनीय बाब आहे. तपासासाठी गेलेल्या पोलीस उपनिरीक्षकांना चक्क एकाने गाडी इथे का लावली म्हणून शिवीगाळ केली, गाडीची चावी काढून घेत चक्क पायी पाठवले. पोलिसांनी इथं यायचं नाही, असंही धमकावण्यात आलं. सिटी चौक पोलिसांनी या प्रकरणात गुन्हा दाखल केला आहे. ही घटना रविवारी (२२ मार्च) दुपारी सव्वाबाराच्या सुमारास नारळीबागेत घडली.
पोलीस उपनिरीक्षक राहुल विलास शिंदे (वय ३१)यांनी या प्रकरणात तक्रार दिली आहे. ते सिटीचौक पोलीस ठाण्यात कार्यरत आहेत. एका गुन्ह्याच्या तपासासाठी नारळीबाग येथे जेपी इंटरनॅशनल हॉटेलसमोर स्वतःच्या मोटारसायकलीने (एमएच २१ सीके ४७९१) गेले होते. मोटारसायकल रस्त्याच्या बाजूला जावून ते गोपनीय बातमीदाराला भेटण्यासाठी गेले. थोड्यावेळाने परतले असता त्यांच्या मोटारसायकलीजवळ एक जण आला. तो शिंदे यांना म्हणाला, की "तू पोलीस आहेस का? तुम्ही पोलीसवाल्यांनी इकडे यायचे नाही. ही मोटारसायकल इथे का लावली.’, असे म्हणून त्याने शिंदे यांना अर्वाच्च भाषेत बोलला. शिंदे यांनी त्याला पोलीस उपनिरीक्षक असल्याचे सांगून सिटी चौक पोलीस ठाण्यात नियुक्त आहे. तपासाच्या कामानिमित्त येथे आलो आहे, असे सांगितले.
तरीही त्याने शिवीगाळ करत ‘पोलीस आहेस म्हणून काय झाले, असे पोलीसवाले खूप बघितले आहे, तू माझे काय वाकडं करणार आहेस, पोलिसांनी इथे यायच नाही. तू इथून निघून जा’, असे म्हणून शिंदे यांच्या गाडीची चावी हिसकावली. ‘तुझी गाडी मी तुला घेऊन जाऊ देत नाही. तू चालत जा’, असे म्हणून चक्क शिंदे यांना तिथून हाकलून लावले. वाद वाढू नये म्हणून शिंदे तिथून निघून आले. त्या व्यक्तीचे नाव बंटी जैस्वाल (रा. नारळीबाग छत्रपती संभाजीनगर) असल्याचे शिंदे यांना कळले. त्यानंतर शिंदे यांनी सिटी चौक पोलीस ठाण्यात त्याच्याविरुद्ध तक्रार दिली. पोलिसांनी गुन्हा दाखल केला असून, अधिक तपास सहायक पोलीस निरीक्षक मनोज शिंदे करत आहेत.
.jpg)
.jpg)
