तिने सोबत येण्यास नकार देताच दोघांची तिच्या पतीला बेदम मारहाण, धारदार शस्‍त्राचे वार! ; सिडको एन ७ मधील थरार

छत्रपती संभाजीनगर (सीएससीएन वृत्तसेवा) : पतीपासून वेगळे राहणाऱ्या महिलेने सोबत येण्यास नकार दिल्याने आधी तिला मारहाण केली. नंतर तिच्या पतीला बेदम मारहाण करत धारदार शस्‍त्राने त्‍याच्यावर वार केले. यात तिचा पती जखमी झाला आहे. ही घटना गुरुवारी (७ ऑगस्‍ट) सकाळी साडेआठला सिडको एन ७ मधील अयोध्यानगरात घडली.

केशव (वय ४२, नाव बदलले आहे) याने या प्रकरणात तक्रार दिली आहे. तो आंबेडकरनगरात राहतो. खासगी नोकरी करतो. त्‍याची पत्नी वर्षा (नाव बदलले आहे) दोन मुलांसह अयोध्यानगरात राहते. गुरुवारी सकाळी साडेआठला केशव पत्नी राहत असलेल्या ठिकाणी एन ७ सिडको अयोध्यानगर येथे मुलांना शाळेत घेऊन जाण्यासाठी गेला. त्याठिकाणी केशवच्या ओळखीचा सिद्धार्थ डोंगरदिवे (रा. आंबेडकरनगर) व त्याचा मित्र बशीर (पूर्ण नाव व पत्ता माहीत नाही) हे आले.

त्यातील सिद्धार्थ डोंगरदिवे हा वर्षाला म्हणाला, की वर्षा तू माझ्यासोबत चल. त्‍यावर वर्षाने त्याच्यासोबत जाण्यास नकार दिला. त्‍यामुळे सिद्धार्थ तिला हाताचापटाने मारहाण करू लागला. केशवने त्‍याला समजावण्याचा प्रयत्‍न केला असता सिद्धार्थ  व बशीरने केशवला शिवीगाळ करून हाताचापटाने मारहाण केली. सिद्धार्थने काहीतरी टोकदार वस्तूने चेहऱ्याच्या उजव्या गालावर मारले. पोटात लाथाबुक्क्यांनी मारहाण करून दोघे पळून गेले. केशवच्या तक्रारीवरून सिडको पोलिसांनी सिद्धार्थ व बशीरविरुद्ध गुन्हा दाखल केला आहे. अधिक तपास पोलीस अंमलदार मधुकर गोरे करत आहेत.