अबब... साडेचार लाखांचे मोबाइल जवाहरनगर पोलिसांनी मिळवले परत!; तक्रारदारांच्या चेहऱ्यावर उमटले हास्य!!

छत्रपती संभाजीनगर (सीएससीएन वृत्तसेवा) : जवाहरनगर पोलीस ठाण्याच्या हद्दीतून चोरीला गेलेले २० महागडे मोबाइल पोलिसांनी तांत्रिक तपासातून परत मिळवले असून, एकूण ४ लाख ५० हजार रुपयांचे हे मोबाइल ज्‍याचे होते त्‍यांना आज, १२ ऑगस्टला परत करण्यात आले. या वेळी हरवलेला, चोरीला गेलेला मोबाइल परत मिळाल्याने सर्वांनी पोलिसांचे आभार मानले.

राज्‍यासह परराज्‍यातून हे मोबाइल परत मिळविण्यासाठी जवाहरनगर पोलिसांना अक्षरशः कसरत करावी लागली. सॅमसंग, रेडमी, ओपो, विवो, मोटोरोला कंपन्यांचे हे मोबाइल मूळ मालकांना परत करण्याचा सोहळा जवाहरनगर पोलीस ठाण्यात झाला. सहायक पोलीस आयुक्त रणजीत यांच्या हस्ते आपला मोबाइल स्वीकारताना अनेकांच्या चेहऱ्यावर हास्य उमटले होते. वरिष्ठ पोलीस निरीक्षक सचिन कुंभार यांच्या आदेशाने पोलीस अंमलदार मारोती गोरे यांनी मोबाइल चोरीच्या तक्रारींचा तपास केला. मोबाइल परत मिळाल्यानंतर एका तक्रारदाराने पोलिसांचे आभार मानताना सांगितले, की मोबाइल हप्त्याने घेतला होता.

हप्ते अजून भरणे सुरू असतानाच मोबाइल चोरीला गेला होता. दुसऱ्याने सांगितले, की मोबाइल पत्नीने वाढदिवसाला गिफ्ट दिला होता, तर एकाला आई- वडिलांनी त्यांना वाढदिवसाला मोबाइल गिफ्ट केलेला होता. मोबाइल परत मिळाल्याने त्‍यांच्या चेहऱ्यावर आनंद ओसंडून वाहत होता. ही कारवाई पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त रणजीत पाटील, वरिष्ठ पोलीस निरीक्षक सचिन कुंभार यांच्या मार्गदर्शनाखाली पोलीस अंमलदार मारोती गोरे यांनी पार पाडली.

छत्रपती संभाजीनगर नागरिकांना आवाहन करण्यात येते की मोबाइल हरवला किंवा चोरी गेल्यास त्वरित पोलिसांकडे तक्रार दाखल करावी. जेणेकरून शोधकार्य अधिक प्रभावीपणे करता येईल.
- सचिन कुंभार, वरिष्ठ पोलीस निरीक्षक, जवाहरनगर पोलीस ठाणे