गारखेड्याच्या नवनाथनगरात मध्यरात्री राडा; गोंधळ घालू नका म्हणताच चौघांनी लोखंडी रॉडने दोन भावांना केले रक्‍तबंबाळ!!

छत्रपती संभाजीनगर (सीएससीएन वृत्तसेवा) : मध्यरात्री गल्लीत गोंधळ घालणाऱ्यांना टोकल्याने गारखेडा परिसरातील नवनाथनगरात राडा झाला. चौघांनी मिळून एका युवकाला लोखंडी रॉडने बेदम मारहाण करत गंभीर जखमी केले. सध्या या युवकाची प्रकृती गंभीर असून, त्‍याच्यावर सिग्‍मा हॉस्पिटलमध्ये आयसीयूत उपचार सुरू आहेत. ही घटना मंगळवारी (२६ ऑगस्ट) पहाटे पावणेदोनच्या सुमारास (मध्यरात्री) घडली. पुंडलिकनगर पोलिसांनी चौघांविरुद्ध गुन्हा दाखल केला आहे.

भागीराम महादू ढवळे (वय ३५, रा. नवनाथनगर, गारखेडा परिसर) असे गंभीर जखमीचे नाव असून, त्‍यांच्यावर सध्या सिग्मा हॉस्पिटलमध्ये आयसीयूत उपचार सुरू आहेत. ते एसटी वर्क शॉपमध्ये मेकॅनिक आहेत. मंगळवारी (२६ ऑगस्ट) पहाटे पावणेदोनच्या सुमारास (मध्यरात्री) ढवळे यांच्या घरासमोर राहणारे अविनाश शेंडगे, रवि शेंडगे, बुध्दभूषण शेंडगे, बाजूच्या गल्लीतील आदित्य काळे हे जोरजोरात आवाज करून ओरडून धिंगाणा, मस्ती करत होते. ढवळे यांचा मुलगा चिमुकला मुलगा झोपेतून उठून रडू लागल्याने ढवळे हे बाहेर आले व त्‍यांनी अविनाश शेंडगेसह चौघांना घरासमोर गोंधळ घालू नका, असे सांगितले.

त्‍यामुळे संतापलेल्या अविनाश शेंडगे व त्याचा भाऊ रवि शेंडगे यांनी ढवळे यांना शिवीगाळ सुरू केली. ते ऐकून ढवळे यांचा मोठा भाऊ मुंजाभाऊ ढवळे देखील झोपेतून उठून बाहेर आला. दोन्ही भाऊ अविनाश व त्‍याच्या साथीदारांना समजावून सांगत असताना त्‍यांनी दोन्ही भावांना लाथाबुक्क्यांनी मारहाण सुरू केली. अविनाश शेंडगे याने त्याच्या हातातील लोखंडी रॉड भागीराम यांच्या डोक्यात मारला. रवी शेंडगे याने विट फेकून मारली. त्यामुळे भागीराम यांचा कान फाटून रक्तस्त्राव होत गंभीर जखमी होऊन बेशुध्द होऊन कोसळले. मुंजाभाऊ ढवळे यांनी त्‍यांना उपचारारासाठी आधी एमजीएम आणि नंतर सिग्मा हॉस्पिटलमध्ये दाखल केले. अधिक तपास पोलीस उपनिरीक्षक विनोद भालेराव करत आहेत.