संशयित अरुण गव्हाडच्या पाठिशी उद्धव ठाकरे गट राहणार ठाम!; शहरभर संताप तरी डोक्‍यावर राहणार हात, ठाकरे गटाच्या दुटप्पी भूमिकेमुळे तीव्र असंतोष

छत्रपती संभाजीनगर (सीएससीएन वृत्तसेवा) : सिडको एन ६ मधील संभाजी कॉलनीत प्रमोद रमेश पाडसवान (वय ३८) यांच्या हत्‍येप्रकरणात ४ साक्षीदारांचे बुधवारी (२७ ऑगस्ट) सिडको पोलीस ठाण्यात जबाब नोंदवण्यात आले. हत्‍येवेळी २७ लोक त्याठिकाणी हजर होते. पोलिसांनी त्यांचीही चौकशी सुरू केली असून, ४ साक्षीदार त्‍यातलेच आहेत. आतापर्यंत आठ जणांना पोलिसांनी अटक केली असून, यात निमोणे कुटुंबातील ५ जणांचा समावेश आहे. निमोनेची बहीण जयश्री मनोज दानवे अजूनही फरारी असून पोलिसांना तिचा थांगपत्ता अजून लागला नाही.

दरम्यान, आ. अंबादास दानवे यांनी ठाकरे गटाने संशयित अरुण गव्हाडच्या पाठिशी राहण्याचा निर्णय घेतल्याची माहिती एका वृत्तपत्राला दिली. या प्रकरणात गव्हाडचा संबंध नसल्याने ठाकरे गटाकडून त्याच्यावर पक्षीय कारवाई केली जाणार नाही, असे दानवे यांनी म्हटले आहे. गव्हाडला पोलिसांनी अटक केली आहे. अरुण गव्हाडचे आधी पिसादेवी परिसरात हॉटेल होते. काही दिवसांपूर्वी त्याने ट्रॅक्टरची एजन्सी सुरू केली होती.

तो ज्ञानेश्वर निमोने व त्याच्या कुटुंबाला पाठिंबा देत होता, वाद घालण्यासाठी प्रोत्साहन देत असल्याचा आरोप आहे. मात्र दानवेंनी त्‍याच्या डोक्‍यावर हात कायम ठेवण्याचा निर्णय घेतल्याने टीका होत आहे. शहर गुन्हे शाखेचे वरिष्ठ पोलिस निरीक्षक संभाजी पवार यांनी बुधवारी सर्व आरोपींची कसून चौकशी केली. ज्ञानेश्वरच्या जुळ्या भावांना हत्येचे कुठलेच गांभीर्य नसल्याचे पुन्हा दिसून आले. फरारी जयश्रीचा शोध गुन्हे शाखेचे तीन पथके घेत आहेत. तिच्या सासरीदेखील पथक जाऊन आले.

सेकंड हँड वाहनांचा माज...
ज्ञानेश्वरने मुंबईहून दोन सेकंड हँड वाहने विकत आणली होती. त्यावर राजकीय पक्षाचे चिन्ह लावून शहरभर माज दाखवत होता. वाहने लावायला जागा नसल्याने दादागिरी करून पाडसवान कुटुंबाच्या घरासमोर उभ्या करायचा. हत्‍येनंतर दोन दिवस रुग्णालयाच्या आवारातच ही वाहने बेवारस उभी होती. गणपती स्थापनेशिवाय वाहन लावण्यावरूनही आमच्यात वाद होत होते, अशी कबुली ज्ञानेश्वरने पोलिसांना दिली.

कुणी त्रास देत असेल तर तक्रार करा : पोलीस आयुक्‍त
पाडसवान हत्येनंतर शहर पोलिसांबद्दल संताप निर्माण झाला. पोलिसांकडे वेळोवेळी तक्रार करूनही कारवाई न झाल्याचा आरोप आहे. त्यामुळे पोलीस आयुक्त प्रवीण पवार यांनी नागरिकांना आवाहन केले आहे, की आजूबाजूच्या परिसरातील अथवा कोणत्याही व्यक्तीचा काहीही त्रास असेल तर त्यांनी थेट डायल ११२ या पोलिसांच्या हेल्पलाइन क्रमांकावर संपर्क साधावा. जमिनीच्या वादासाठी अथवा इतर कारणांनी त्रास देणाऱ्या व्हाइट कॉलर गुंडागर्दीची तक्रार नागरिकांनी निर्भयपणे ११२ वर करावी. ठाण्यात अर्ज करावा तरीही आपले समाधान न झाल्यास वरिष्ठ अधिकारी वर्गाची भेट घ्यावी, असे आवाहन पोलीस आयुक्त प्रवीण पवार यांनी केले आहे.