१५ दिवसांपासून माहेरी राहणाऱ्या पत्‍नीला न्यायला पती आला, त्‍याला अजून कळेना की शेजाऱ्यांनी का मारहाण केली…, हर्सूल पोलिसांनी केला गुन्हा दाखल

छत्रपती संभाजीनगर (सीएससीएन वृत्तसेवा) : १५ दिवसांपासून माहेरी भेटायला आलेल्या पत्‍नीला नेण्यासाठी पती सासरवाडीत आला. मात्र साला वाईट बोलल्याने पती-पत्‍नी तिथून दुसऱ्या नातेवाइकाकडे निघाले असता शेजारच्या दोघांनी घेण ना देणं, पतीला बेदम मारहाण करत शिवीगाळ केली. ही घटना जटवाडा रोडवरील अंबरहिल येथे घडली. या प्रकरणी हर्सूल पोलिसांनी शनिवारी (११ जुलै) दोघांविरुद्ध गुन्हा दाखल केला आहे.

फैजल शेख (वय ३०) व रेखा गंगावणे (वय ४२, रा. अंबरहिल जटवाडा रोड) अशी हल्लेखोरांची नावे आहेत. कुंदन पुंडलिक साळवे (वय ३३, रा. कल्याण डोंबिवली) यांनी या प्रकरणात तक्रार दिली आहे. ते पत्नी सोनाली, मुलगी अम्रपाली, कल्याणी यांच्यासह राहतात. खासगी कंपनीत हेल्पर आहेत. छत्रपती संभाजीनगरात जटवाडा रोडवरील अंबरहीलमध्ये त्‍यांची सासरवाडी आहे. पंधरा दिवसांपासून पत्नी, दोन लहान मुली सासरवाडीत भेटण्यासाठी आल्या होत्या. ५ जुलै रोजी संध्याकाळी सहाला कुंदन साळवे हे सासरवाडीला अंबरहिल येथे पत्नी व मुलींना घेण्यासाठी आले.

स्वयंपाक चालू असल्याने गच्चीवर जाऊन थांबले होते. त्यानंतर रात्री पावणेदहाला भांडणाचा आवाज ऐकून ते खाली आले असता साला किरण ओव्हळ हा त्‍यांची पत्‍नी सोनालीसोबत जोरजोराने बोलून तुझा नवरा इथे कशाला आला, अशी विचारणा त्‍याने केली. कुंदन व सोनाली हे रागाने तिथून उस्मानपुरा येथे आत्येभावाकडे जाण्यासाठी निघाले. त्‍याचवेळी सासऱ्यांच्या शेजारी राहणारे फैजल शेख (वय ३०), रेखा गंगावणे (वय ३२) मागून आले. ते म्हणाले, की तुम्ही कुठे चालले? त्‍यावर कुंदन म्हणाले, की आम्ही उस्मानपुरा येथे आत्येभावाकडे चाललो आहे.

त्यावेळी फैजलने तू जास्त मस्तीत आलास का, असे म्‍हणत कुंदन यांना मारहाण सुरू केली. शिवीगाळ करू लागला. रेखा गंगावणे हिनेही शिवीगाळ करून हाताचापटांनी मारहाण केली. त्यावेळी कुंदन यांनी तुम्ही मला विनाकारण का मारता, तुमचा माझा काय संबंध आहे, असे म्हणताच फैजल शेख याने त्याच्याजवळील फायटरने कुंदन यांच्या डाव्या डोळ्यावर मारून जखमी केले. पत्‍नी सोनालीने आरडाओरड केल्याने फैजल शेख, रेखा गंगावणे शिवीगाळ करून जीवे मारण्याची धमकी देत तेथून निघून गेले. त्यानंतर पती-पत्‍नी पोलिसांत तक्रार करण्यासाठी आले. अधिक तपास पोलीस उपनिरीक्षक गणेश केदार करत आहेत.