वाळूज MIDC त चोरट्यांचे थैमान!; बजाजनगरात ४ दुकाने फोडली, साडेतीन लाखांचा ऐवज लंपास

By City News Desk

On 12 Jan 2025

वाळूज महानगर (सीएससीएन वृत्तसेवा) : वाळूज एमआयडीसीत चोरट्यांनी अक्षरशः थैमान घातले असून, घरे, मंदिरेही न सोडणाऱ्या चोरट्यांनी आणखी ४ दुकाने फोडून नवे पोलीस निरीक्षक रामेश्वर गाडे यांना एकप्रकारे सलामीच दिली. जय भवानी चौकातील विशाल पवार यांची मोबाइल शॉपी, प्रतिक देसाई यांचे मेडिकल दुकान, राधाकृष्ण फोटो फ्रेम मेकर्स ॲन्ड जनरल स्टोअर, श्री गजानन व्हाइट लाँड्री ही […]

वाळूज महानगर (सीएससीएन वृत्तसेवा) : वाळूज एमआयडीसीत चोरट्यांनी अक्षरशः थैमान घातले असून, घरे, मंदिरेही न सोडणाऱ्या चोरट्यांनी आणखी ४ दुकाने फोडून नवे पोलीस निरीक्षक रामेश्वर गाडे यांना एकप्रकारे सलामीच दिली. जय भवानी चौकातील विशाल पवार यांची मोबाइल शॉपी, प्रतिक देसाई यांचे मेडिकल दुकान, राधाकृष्ण फोटो फ्रेम मेकर्स ॲन्ड जनरल स्टोअर, श्री गजानन व्हाइट लाँड्री ही दुकाने चोरट्यांनी फोडली. साडेतीन लाख रुपयांचा ऐवज लंपास केला आहे. पोलिसांनी गस्त वाढविण्याची मागणी नागरिकांनी केली आहे.

विशाल पवार यांच्या मोबाइल शॉपीचे शटर उचकटून चोरटे आत शिरले. त्‍यांनी नवीन २० मोबाइल, दुरुस्तीसाठी आलेले १० मोबाइल, स्मार्टवॉच असा अडीच लाख रुपयांचा ऐवज चोरून नेला. शेजारीच असलेल्या प्रतिक देसाई यांच्या मेडिकल दुकानातील २७ हजार रुपये रोख, परफ्‍यूम, कॉस्‍मेटिक साहित्य असा एकूण १ लाख रुपयांचा ऐवज चोरून नेला. मेडिकलच्या बाहेरील कॅमेऱ्यात तोंडाला रुमाल बांधलेले तीन चोरटे कैद झाले आहेत. चोरट्यांनी राधाकृष्ण फोटो फ्रेम मेकर्स ॲन्ड जनरल स्टोअर, श्री गजानन व्हाइट लाँड्री ही दुकानांतही चोरीचा प्रयत्‍न केला. ही घटना बिल्डिंग मालकांना सकाळी लक्षात आल्यानंतर दुकानमालकांना कळवले. त्‍यानंतर पोलिसांना कळविण्यात आले. पोलिसांनी पाहणी करून पंचनामा केला.