मुकुंदवाडीच्या स्वराजनगरात दोन महिलांत ‘फ्री स्‍टाइल’

छत्रपती संभाजीनगर (सीएससीएन वृत्तसेवा) : मुलाला मारल्यावरून दोन महिलांत वाद होऊन जोरदार हाणामारी झाली. यात एका महिलेने दुसरीला बेदम मारहाण केली. तिच्या पतीनेही तिला मारहाण करण्यात साथ दिली. अखेर मुलाच्या आईला पळ काढावा लागला. ही घटना मुकुंदवाडी परिसरातील स्वराजनगरात मंगळवारी (१ जुलै) रात्री आठच्या सुमारास घडली.

रेणुका शर्मा (रा. साईबाबा मंदिराच्या पाठिमागे, स्वराजनगर, मुकुंदवाडी) व तिच्या पतीविरुद्ध गुन्हा दाखल केला आहे. मनिषा सखाराम सांगळे (वय ३०, रा. स्वराजनगर गेट नं. ५६ मुकुंदवाडी) यांनी या प्रकरणात तक्रार दिली आहे. त्‍या पती सखाराम सांगळे व मुलासोबत राहतात. पती मजुरीचे काम करून कुटुंबाचा उदरनिर्वाह चालवतात. मंगळवारी (१ जुलै) रात्री आठला त्‍यांचा मुलगा गणेश हा स्वराजनगर येथील साईबाबा मंदिरामागे खेळत होता. त्‍यांच्या गल्लीसमोर राहणारी रेणुका शर्मा हिने गणेशला मारहाण केली. तो रडत घरी आला. त्याने सांगितले, की मला रेणुका काकूने मारले.

त्यामुळे मनिषा या तिला तिच्या घरी जाब विचारायला गेल्या असता रेणुकाने मनिषा यांना हाताचापटाने मारहाण करून शिवीगाळ केली व तिच्या हातात असलेल्या बॅटने डोक्यात मारून जखमी केले. तिच्या पतीने मनिषा यांना मागून विटा, दगड फेकून मारले. त्यामुळे मनिषा जखमी होऊन तिथून पळाल्या आणि सरळ मुकुंदवाडी पोलीस ठाणे गाठले. पोलिसांनी त्‍यांना उपचारासाठी घाटी रुग्णालयात पाठवले. उपचार घेतल्यानंतर मनिषा यांनी रेणुका शर्मा व तिच्या पतीविरुद्ध तक्रार दिली. त्‍यावरून पोलिसांनी शर्मा दाम्‍पत्‍याविरुद्ध गुन्हा दाखल केला आहे. अधिक तपास पोलीस अंमलदार गावंजी कोंडके करत आहेत.