छ. संभाजीनगर जिल्ह्यात ४ नव्या एमआयडीसी, सिल्लोडमध्ये शेतकऱ्यांचा विरोध

By City News Desk

On 22 Aug 2025

छ. संभाजीनगर जिल्ह्यात ४ नव्या एमआयडीसी, सिल्लोडमध्ये शेतकऱ्यांचा विरोध

छत्रपती संभाजीनगर (सीएससीएन वृत्तसेवा) : छत्रपती संभाजीनगर जिल्ह्यात ४ नव्या एमआयडीसी होणार आहेत. यात सटाणा, अंबेलोहळ, आरापूर आणि सिल्लोडचा समावेश असून, सिल्लोड एमआयडीसीला शेतकऱ्यांनी विरोध केल्याने सरकार एक पाऊल मागे येण्याची शक्यता आहे.

जिल्ह्यात दिल्ली-मुंबई इंडस्ट्रीयल कॉरिडोअरच्या (डीएमआयसी) शेंद्रा आणि बिडकीन औद्योगिक पट्ट्यासह वाळूज, शेंद्रा आणि चिकलठाणा औद्योगिक वसाहतीत आता जागा शिल्लक राहिलेली नाही. त्यामुळे नव्या ४ एमआयडीसींचा विचार सुरू झाला आहे. आरापूर एमआयडीसीसाठी लवकरच भूसंपादन आणि शेतकऱ्यांसोबत जमीन दरासंदर्भात वाटाघाटी सुरू होणार असून, सिल्लोडमध्ये मात्र चारपैकी तीन गावांतील शेतकऱ्यांनी कडाडून विरोध केला आहे. सटाणा येथे संयुक्त मोजणी झाली. जमिनीच्या दरासंदर्भात शेतकऱ्यांसोबत प्राथमिक बैठक झाली आहे, तर दुसरी बैठक लवकरच होणार आहे. अंबेलोहळ (ता. गंगापूर) येथे जमीन निवड समितीने पाहणी केली आहे. एमआयडीसीचा प्रस्ताव स्थानिक प्रादेशिक कार्यालयाने वरिष्ठांकडे पाठवला आहे.
सटाणा : सरकारी जमीन २८.८९ हेक्टर, खासगी जमीन १०९.९२ हेक्टर एकूण-१३८.८१ हेक्टर
अंबेलोहळ : सरकारी जमीन-३.४० हेक्टर, खासगी जमीन- १६७.०९ हेक्टर, एकूण १७०.०९ हेक्टर
आरापूर : सरकारी जमीन- ९.६० हेक्टर, खासगी क्षेत्र- ७५२.४३ हेक्टर, एकूण ७६२.०३ हेक्टर
सिल्लोड : एकूण जमीन २९०.९१ हेक्टर सर्वाधिक खासगी जमीन.